ისრაელის პრემიერ-მინისტრმა, ბენიამინ ნეთანიაჰუმ დაადასტურა თავისი გეგმა, რომლის მიხედვითაც, ისრაელი სრულ კონტროლს დაამყარებს ღაზის სექტორზე.
ექსკლუზიურ ინტერვიუში Fox News-თან, ნეთანიაჰუმ განაცხადა, რომ ეს ნაბიჯი მიზნად ისახავს „ჰამასის“ განადგურებას და საბოლოოდ მმართველობის გადაცემას არაბული ხელისუფლებებისთვის.
„ჩვენ გვსურს, გავთავისუფლდეთ და გავათავისუფლოთ ღაზის მოსახლეობა „ჰამასის“ საშინელი ტერორისგან. ჩვენი უსაფრთხოების უზრუნველსაყოფად, იქიდან ჰამასის მოსაცილებლად, ღაზის მოსახლეობის გასათავისუფლებლად და სამოქალაქო მმართველობისთვის გადასაცემად“, – განაცხადა ნეთანიაჰუმ.
მიუხედავად იმისა, რომ ნეთანიაჰუ ამტკიცებს, რომ ისრაელი არ გეგმავს ღაზის ხანგრძლივ ოკუპაციას, მან ხაზი გაუსვა უსაფრთხოების მუდმივი უზრუნველყოფის საჭიროებას და „ჰამასის“ დაშლას.
„ერთადერთი გზა, რომ განსხვავებული მომავალი გქონდეთ, არის ამ ნეონაცისტური არმიის მოცილება. „ჰამასი“ მონსტრები არიან“, – დასძინა მან.