დღეს, აქ ვიმყოფებით, რათა პატივი მივაგოთ ჩვენს გმირ ჯარისკაცებს, ეროვნულ გმირებს იმისთვის, რომ მათ ყველაზე ძვირფასი გაიღეს ჩვენი სამშობლოს თავისუფლებისთვის. პატივი და დიდება მათ ხსოვნას, – განაცხადა საქართველოს პრეზიდენტმა მიხეილ ყაველაშვილმა მუხათგვერდის ძმათა სასაფლაოზე, სადაც მან აგვისტოს ომში დაღუპული ჯარისკაცების ხსოვნას პატივი მიაგო.
მისი თქმით, სწორედ გმირი ჯარისკაცების დამსახურებაა, რომ საქართველო ფეხზე დგას.
„საქართველოს ყოველთვის ჰყავდა გმირი ჯარისკაცები, ჰყავს და მომავალშიც ეყოლება. აქამდე, რომ მოვედით სწორედ ჩვენი გმირი ხალხის, ჩვენი გმირი ჯარისკაცების, მეომრების დამსახურებაა. ქედს მოვიხრით მათ წინაშე. მუდმივად უნდა გვახსოვდეს როგორი გმირები ჰყავთ საქართველოს.
ამავე დროს ჩვენი გმირები აკეთებდნენ, აკეთებენ და გააკეთებენ ეს არის მათი მოვალეობა. იციან ჩვენმა ჯარისკაცებმა თუ რას ნიშნავს სამშობლოს დაცვა და რას ნიშნავს იყო სამშობლოს ჯარისკაცი და მცველი. ჩვენ ვართ სახელმწიფო, სადაც თითოეულ ინსტიტუტს აქვს თავისი ვალდებულება. ეს უნდა გავმიჯნოთ. ჯარისკაცს აქვს თავისი მოვალეობა და ვალდებულება, სახელმწიფოს მეთაურებს, ინსტიტუციებს, ხელისუფლებას ყველას გაგვაჩნია ჩვენი ვალდებულება სამშობლოს წინაშე. მთავარი ვალდებულება არის შევასრულოთ ჩვენი როლი და ვალი ჩვენი სამშობლოს წინაშე. ჩვენი ვალია, რომ დავიცვათ ჩვენი სამშობლო, ჩვენი სამშობლოს ინტერესები“, – განაცხადა მიხეილ ყაველაშვილმა.