დონალდ ტრამპის ადმინისტრაციამ ვენესუელის პრეზიდენტის, ნიკოლას მადუროს დაპატიმრებისთვის დაწესებული ჯილდო 25 მილიონიდან 50 მილიონ დოლარამდე გაზარდა.
ამის შესახებ აშშ-ის გენერალურმა პროკურორმა, პამ ბონდიმ განაცხადა.
დონალდ ტრამპის ადმინისტრაცია ნიკოლას მადუროს ნარკოტიკებით ვაჭრობაში სდებს ბრალს, ასევე კარტელებთან თანამშრომლობით აშშ-ში „ფენტანილის“ შემცველი კოკაინის შემოტანაში მონაწილეობას.
„პრეზიდენტ ტრამპის ხელმძღვანელობით, მადურო ვერ გაექცევა სამართლიანობას და ის პასუხს აგებს თავისი საზიზღარი დანაშაულებისთვის“, – განაცხადა ბონდიმ.
მადუროს ბრალი მანჰეტენის ფედერალურ სასამართლოში 2020 წელს, ტრამპის პირველი საპრეზიდენტო ვადის დროს წაუყენეს. იმ დროს აშშ-მა მისი დაპატიმრებისთვის 15 მილიონი დოლარის ჯილდო დააწესა.
მოგვიანებით ჯო ბაიდენის ადმინისტრაციამ ჯილდო 25 მილიონ დოლარამდე გაზარდა, ანალოგიური თანხა 2001 წელს ოსამა ბინ ლადენის დაჭერისთვის იყო დაწესებული.