აშშ-ის თავდაცვის დეპარტამენტი განიხილავს შესაძლებლობას უკრაინისთვის განკუთვნილი გარკვეული შეიარაღება და აღჭურვილობა ამერიკულ საწყობებში დააბრუნოს. ინფორმაციას CNN-ი ავრცელებს.
ტელეარხის ცნობით, ამის შესახებ ცნობილი პენტაგონის პოლიტიკური განყოფილების ხელმძღვანელის წერილიდან გახდა, რომელსაც ოთხი ადამიანი გაეცნო.
როგორც CNN-ი იუწყება, ასეთმა რადიკალურმა ნაბიჯმა, შესაძლოა, ამერიკას საშუალება მისცეს საკუთარი მარაგები შეავსოს იმ შეიარაღებით, რომლის წარმოებაზეც მილიარდობით დოლარი იყო გამოყოფილი.
აშშ-ის პრეზიდენტის, დონალდ ტრამპისა და რუსეთის ლიდერის, ვლადიმერ პუტინის შეხვედრამდე, რომელიც, სავარაუდოდ, მომავალ კვირას გაიმართება, პენტაგონის ასეთი გადაწყვეტილება სულ უფრო მეტ გაურკვევლობას სძენს უკრაინისთვის ამერიკული იარაღის მიწოდების საქმეს, წერს CNN-ი.
ტელეარხის ცნობით, მიუხედავად იმისა, რომ ტრამპმა ნატოს მეშვეობით უკრაინისთვის ამერიკული იარაღის გადაცემის გეგმას მხარი დაუჭირა, პენტაგონში მაინც შიშობენ, რომ ეს ამერიკული არსენალების ხარჯზე მოხდება. განსაკუთრებით ეს ეხება ძალზე მოთხოვნად პროდუქციას, რომელიც დეფიციტშია, მაგალითად, გადამჭერი რაკეტები, პაერსაწინააღმდეგო სისტემები და საარტილერიო ჭურვები.
CNN-ი აღნიშნავს, რომ გასულ თვეს აშშ-ის თავდაცვის მდივანმა, პიტ ჰეგსეტმა უკრაინისთვის განკუთვნილი შეიარაღების დიდი პარტიის გადაცემა შეაჩერა. ჰეგსეტი პოლიტიკურ საკითხებში მისი მოადგილის, უკრაინაში შეიარაღების გაგზავნის მოწინააღმდეგის, ელბრიჯ კოლბის მიერ შედგენილი წერილით ხელმძღვანელობდა.