მაქვს პატივი, კვლავ ვიყო მაჟორიტარობის კანდიდატი ისნის ოლქში (ავლაბარი, მეტრომშენი, ელია). დიდ მადლობას ვუხდი ქალაქის მერს, ბატონ კახა კალაძეს, მმართველ პარტიას „ქართული ოცნება-დემოკრატიული საქართველო“-ს გუნდს, რომელმაც გამომიცხადა ნდობა, – წერს ისნის რაიონის მაჟორიტარობის კანდიდატი კახაბერ ლაბუჩიძე სოციალურ ქსელში.
ლაბუჩიძე მადლობას უხდის ყველას, ვინც მას მხარი დაუჭირა და ნდობა გამოუცხადა.
„ჩემი მეორედ დასახელება მაჟორიტარობის კანდიდატად არ არის მხოლოდ ჩემი წარმატება – ეს არის ჩვენი საერთო გზა, ჩვენი ერთიანი ძალისხმევის შედეგი.
მინდა გულწრფელი მადლობა გადავუხადო თითოეულ თქვენგანს, ყველას, ვინც მხარი დამიჭირა, დამიდგა გვერდით და თავისი ნდობით გამაძლიერა.
თქვენი მხარდაჭერით მომეცა საშუალება, გასული 4 წლის მანძილზე ისანში მცხოვრები თითოეული მოქალაქის საჭიროებებს გავცნობოდი და სამაჟორიტარო ბიუროსთან ყოველდღიური მუშაობის რეჟიმში მომეხდინა სათანადო რეაგირება ჩემი კომპეტენციის ფარგლებში.
დღეს გვაქვს მშვიდობა, რამაც ჩვენს ქალაქს მისცა მეტი განვითარების შესაძლებლობა. გარწმუნებთ, ეს აღმშენებლობა კიდევ უფრო ინტენსიურად გაგრძელდება და ჩვენი რაიონი კიდევ უფრო დამშვენდება. თვალსაჩინოა როგორც ჩვენი დედაქალაქის, ისე რაიონის სახეცვლილება და ეს შეუქცევადი პროცესია. თქვენმა ნდობამ და სიყვარულმა ამჯერადაც მომცა ძალა ამ ნაბიჯის გადასადგმელად. კანდიდატობა ჩემთვის არ არის მხოლოდ პოლიტიკური პასუხისმგებლობა – ეს არის პირადი ვალდებულება, ვემსახურო თითოეულ თქვენგანს, დავიცვა თქვენი ინტერესები და გავაგრძელო ბრძოლა ჩვენი ქალაქის უკეთესი მომავლისთვის.
დღეს გვაქვს სტაბილური სახელმწიფო, მაგრამ წინ ახალი გამოწვევებია. თქვენი მხარდაჭერით შევძლებთ ახალი პროექტების დაწყებას, კიდევ უფრო ძლიერი ქალაქის აშენებას და თითოეული ოჯახის სიმშვიდის უზრუნველყოფას. ჩვენ არ ვამბობთ ცარიელ სიტყვებს – ჩვენ ვაგრძელებთ საქმეს, რომელიც უკვე დაწყებულია. მოდით, ერთად შევინარჩუნოთ ის მიღწევები, რაც ერთმნიშვნელოვნად თვალსაჩინოა და გავაგრძელოთ სვლა უკეთესი მომავლისკენ.
თითოეული თქვენი ხმა და მხარდაჭერა გადამწყვეტი იქნება. ერთად ჩვენ აუცილებლად გავიმარჯვებთ!
მშვიდობა საქართველოს, მეტი სიკეთე თბილისს!“, – წერს ლაბუჩიძე.