თეთრი სახლის სპიკერმა, კეროლაინ ლევიტმა უკრაინაზე რუსეთის სარაკეტო თავდასხმის კომენტირებისას რუსეთის ნავთობგადამამუშავებელ ქარხნებზე უკრაინის დარტყმები გაიხსენა და განაცხადა, რომ „შესაძლოა, ორივე მხარეს“ არ სურს ომის დასრულება.
ლევიტის თქმით, მან დონალდ ტრამპთან რუსეთის ბოლოდროინდელი თავდასხმა განიხილა და „ის ამ ამბით კმაყოფილი არ იყო, მაგრამ გაკვირვებულიც არ დარჩენილა“.
„საუბარია ორ ქვეყანაზე, რომლებიც ძალიან დიდი ხანია ომის მდგომარეობაში არიან. რუსეთმა კიევზე ეს თავდასხმა განახორციელა, ისევე როგორც უკრაინამ ცოტა ხნის წინ დაარტყა რუსეთის ნავთობგადამამუშავებელ ქარხნებს. ფაქტობრივად, აგვისტოს განმავლობაში მათ გაანადგურეს რუსეთის ნავთობგადამამუშავებელი ქარხნების სიმძლავრეების 20%“, – დასძინა მან.
ლევიტმა ასევე აღნიშნა, რომ ტრამპი „ყურადღებით აგრძელებს“ სიტუაციის მონიტორინგს და სურს ომის დასრულება, რათა ხალხის მკვლელობა შეწყდეს.
უკრაინის სახელმწიფო საგანგებო სიტუაციების სამსახურის მიერ გავრცელებული უახლესი ინფორმაციით, რუსეთის თავდასხმის შედეგად კიევში დაღუპულთა რიცხვი 19-მდე გაიზარდა. მათ შორის ოთხი ბავშვია, რომელთაგან ერთ-ერთი ორი წლისაა.
დაშავებულია 52 ადამიანი. მაშველები ინტენსიურად აგრძელებენ სამაშველო სამუშაოებს, რათა ნანგრევებში მოყოლილი ადამიანები იპოვონ და უსაფრთხო ადგილზე გადაიყვანონ.
რუსეთის იერიშის შედეგად დედაქალაქში დაზიანდა საცხოვრებელი კორპუსები, კერძო სახლები, საბავშვო ბაღები და სხვადასხვა დაწესებულების ოფისები, მათ შორის ევროკავშირის დელეგაციის შენობა.