აშშ-ის ვიცე-პრეზიდენტი ჯეი დი ვენსი ამერიკული გამოცემის, „პოლიტიკოს“ სტატიას აკრიტიკებს და აცხადებს, რომ ავტორი გაბრაზებულ „დიფსთეითერებს“ დაეყრდნო. საუბარია პუბლიკაციაზე, რომელშიც გაკრიტიკებულია აშშ-ის სპეციალური წარმომადგენლის, სტივ უიტკოფის რუსეთთან წარმოებული მოლაპარაკებები და ნათქვამია, რომ უიტკოფი არაკომპეტენტურია.
სოციალურ ქსელში გამოქვეყნებულ პოსტში ჯეი დი ვენსი წერს, რომ „პოლიტიკოს“ ეს სტატია „უცხოური გავლენის ოპერაციაა“.
„ეს ისტორია „პოლიტიკოდან“ არის ჟურნალისტური უმეცრება. ეს ბევრად მეტია, ეს არის უცხოური გავლენის ოპერაცია, რომლის მიზანიცაა ადმინისტრაციისა და ჩვენი ერთ-ერთი ყველაზე ეფექტური წევრის დისკრედიტაცია. შეამჩნიეთ, რომ ყველა, ვინც სტივს თავს ესხმის, ანონიმურია? ეს ნიშნავს, რომ ისინი არიან ორი ან სამი „დიფსთეითერი“ (ბიუროკრატი), რომლებიც გაბრაზებულნი არიან, რადგან უიტკოფმა იქ მიაღწია წარმატებას, სადაც მათ ვერ შეძლეს“, – აღნიშნა ვენსმა.
აშშ-ის ვიცე პრეზიდენტი ასევე აცხადებს, რომ სტატიაში არ არის სრულად მოყვანილი ოფიციალური პირების ციტატები. ამ კონტექსტში ჯეი დი ვენსი ეჭვქვეშ აყენებს სტატიის ავტორი ჟურნალისტის კეთილსინდისიერებას და ასევე ამტკიცებს, რომ პუბლიკაციაში მოყვანილი ანონიმური წყაროების მიზანს წარმოადგენს ტრამპის სამშვიდობო ძალისხმევის დისკრედიტაცია.
„მაინტერესებს, დაფიქრებულა თუ არა ავტორი საერთოდ იმაზე, რატომ მივიდნენ ეს ანონიმური წყაროები მასთან სწორედ ამ მომენტში, ამ კონკრეტული ისტორიით? მათ მიზნად აქვთ პრეზიდენტის სამშვიდობო მცდელობების ჩაშლა და დაინახეს ეს ჟურნალისტი, როგორც სასარგებლო ინსტრუმენტი, რომლითაც შეძლებდნენ, სიბინძურე გაეტანათ საინფორმაციო სივრცეში. არსებობს ორი შესაძლო ახსნა: ან ავტორი, უბრალოდ, ძალიან ჭკვიანი არ არის და თავის თავი „დიფ სთეითის“ თაღლითებს გამოაყენებინა, ან თავადვე მონაწილეობს ამაში და შეგნებულად გამოიყენა თავისი პოზიცია პირდაპირ უცხოური გავლენის ოპერაციაში. ორივე შემთხვევაში ეს სამარცხვინოა“, – წერს ვენსი.
აშშ-ის ვიცე პრეზიდენტი იქვე აქებს სტივ უიტკოფს და აცხადებს, რომ მისი ძალისხმევის შედეგად აშშ-მა შეძლო რუსეთთან უკრაინის წინააღმდეგ მიმდინარე ომის დასრულების შესახებ მოლაპარაკებებში „ღია საკითხების ნუსხის შევიწროება“.
„ჩვენ შევზღუდეთ ღია საკითხების ნუსხა რუსეთ-უკრაინის ომში კონკრეტულ პრობლემებამდე. კერძოდ, უსაფრთხოების გარანტიები და ტერიტორიული დათმობები. შეიძლება მშვიდობა მივიღოთ, შეიძლება – ვერა. მაგრამ თუ ეს მოხდება, მხოლოდ იმიტომ, რომ სტივ უიტკოფმა და აშშ-ის პრეზიდენტმა თავი არ დაზოგეს, მაშინაც კი, როცა მედიამ პირდაპირი ტყუილებით სცადა მათი დისკრედიტაცია“, – წერს ვენსი.