კონსერვატორი კომენტატორის, ჩარლი კირკის ცეცხლსასროლი იარაღიდან დაჭრას ამერიკელი პოლიტიკოსები ეხმაურებიან.
დემოკრატი კონგრესმენი და წარმომადგენელთა პალატის ყოფილი სპიკერი ნენსი პელოსი აცხადებს, რომ ლოცულობს კირკის გამოჯანმრთელებისთვის.
„პოლიტიკურ ძალადობას აბსოლუტურად არ აქვს ადგილი ჩვენს ქვეყანაში. ყველა ამერიკელმა უნდა ილოცოს ჩარლი კირკის გამოჯანმრთელებისთვის და გულში ჩაიხუტოს იუტას უნივერსიტეტის მთელი საზოგადოება, რომელიც ამ ძალადობის ტრავმას განიცდის“, – დაწერა პელოსიმ სოციალურ ქსელში.
აშშ-ის წარმომადგენელთა პალატის ყოფილმა წევრმა, გაბი გიფორდსმაც გამოაქვეყნაპოსტი, სადაც დაგმო პოლიტიკურ უთანხმოებაზე ძალადობრივი პასუხი. ცნობისთვის, 2011 წელს გიფორდსი თავში დაჭრეს ამომრჩევლებთან შეხვედრისას. ის გადარჩა, მაგრამ ტვინის დაზიანების გამო თანამდებობა დატოვა.
„დემოკრატიულ საზოგადოებებს ყოველთვის ექნებათ პოლიტიკური უთანხმოებები, მაგრამ ჩვენ არ უნდა დავუშვათ, რომ ამერიკა იმ ქვეყნად იქცეს, სადაც ამ უთანხმოებებს ძალადობას უპირისპირებენ,“ – განაცხადა გიფორდსმა.
კონსერვატორ კომენტატორ ჩარლი კირკს იუტა ველის უნივერსიტეტის ღონისძიებაზე ესროლეს. კომენტატორი საავადმყოფოში გადაიყვანეს. კირკის კოლეგების ინფორმაციით, ის კისრის არეშია დაჭრილი. პოლიციის ცნობით, კირკის მისამართით გასროლაში ეჭვმიტანილი პირი დაკავებულია.