აშშ-ის ყოფილმა პრეზიდენტმა, ბარაკ ობამამ დონალდ ტრამპის ადმინისტრაცია ცენზურაში და თვალთმაქცობაში დაადანაშაულა.
ბარაკ ობამა გამოეხმაურა კომედიური სატელევიზიო შოუს წამყვანის, ჯიმი კიმელის გადაცემის ეთერიდან მოხსნას.
„მრავალი წლის განმავლობაში „გაუქმების კულტურაზე“ ჩივილის შემდეგ, დღევანდელმა ადმინისტრაციამ ეს კულტურა აიყვანა ახალ და საშიშ დონზე, მედიაკომპანიების მიმართ მარეგულირებელი ზომების გამოყენების შესახებ რეგულარული მუქარებით, თუ ისინი არ აიძულებენ გაჩუმებას ან არ გაათავისუფლებენ რეპორტიორებს და კომენტატორებს, რომლებიც არ მოსწონთ“, – წერს ბარაკ ობამა სოციალურ ქსელ „იქსში“.
ცნობისთვის, 18 სექტემბერს უოლტ დისნეის მფლობელოებაში მყოფი ტელეკომპანია „ეიბისი“ განუსაზღვრელი ვადით აჩერებს ჯიმი კიმელის შოუს. გადაწყვეტილება მას შემდეგ იყო მიღებული, რაც კიმელის მიერ ცნობილი კონსერვატორი კომენტატორის, ჩარლი კირკის მკვლელობის შესახებ გაკეთებულ კომენტარებს აშშ-ის კომუნიკაციების ფედერალური კომისიის უფროსის კრიტიკა მოჰყვა.
თავის კომენტარს აშშ-ის ყოფილმა პრეზიდენტმა, ბარაკ ობამამ სტატია დაურთო, რომლის ავტორიც ამტკიცებს, რომ „ჯიმი კიმელი ეთერიდან იმის გამო მოხსნეს, რომ ტრამპის ადმინისტრაციას არ მოსწონდა, რასაც ის ამბობდა და თეთრი სახლი ემუქრებოდა მის დამსაქმებელს, ვიდრე კიმელი არ გააჩუმეს“.
„სწორედ სახელმწიფოს მხრიდან ასეთი იძულების პრევენცია უნდა მოახდინოს აშშ-ის კონსტიტუციის პირველმა შესწორებამ და, მედიაკომპანიებმა უნდა დაიწყონ წინააღმდეგობის გაწევა, ნაცვლად კაპიტულაციისა“, – წერს ბარაკ ობამა.