ვენესუელის თავდაცვის მინისტრმა, ვლადიმირ პადრინო ლოპესმა განაცხადა, რომ აშშ-ის სამხედროების განთავსება კარიბის ზღვაში „გამოუცხადებელი ომია“. ინფორმაციას ამის შესახებ ფრანგული გამოცემა Le Figaro ავრცელებს.
„ეს გამოუცხადებელი ომია და თქვენ უკვე ხედავთ, როგორ სიკვდილით დასაჯეს კარიბის ზღვაში ადამიანები, მიუხედავად იმისა, იყვნენ თუ არა ისინი ნარკორეალიზატორები. სიკვდილით დასაჯეს, დაცვის უფლების გარეშე“, – აღნიშნა ვლადიმირ პადრინო ლოპესმა.
მინისტრის თქმით, ამერიკელ სამხედროებს ამდენი ტექნოლოგია და ძალა აქვთ და ამის მიუხედავად, „არ შეუძლიათ, შეაჩერონ ნებისმიერი გემი კარიბის ზღვაში“.
ამერიკის ოპერაციის საპასუხოდ, კარაკასმა 3-დღიანი სამხედრო წვრთნები წამოიწყო კარიბის ზღვის კუნძულ ლა ორჩილაზე, რომელიც ვენესუელის კონტინენტური ნაწილიდან დაახლოებით 65 კილომეტრში მდებარეობს.