ჩვენთვის მეღვინეობა არ არის მხოლოდ ეკონომიკისა და სოფლის მეურნეობის ერთ-ერთი დარგი – მეღვინეობა, კულტურის და ჩვენი იდენტობის განუყოფელი ნაწილია, – ამის შესახებ საქართველოს პრემიერ-მინისტრმა ირაკლი კობახიძემ მეღვინეობა “ვაინ ერას” გახსნის ღონისძიებაზე სიტყვით გამოსვლისას განაცხადა.
მთავრობის მეთაურმა კომპანიის დამფუძნებლებს ღვინის ქარხნის გახსნა მიულოცა და მათ წარმატებები უსურვა. პრემიერის შეფასებით, მისასალმებელია, რომ მეღვინეობა “ვაინ ერას” ქარხანაში ღვინო ძველი ტრადიციებით და ევროპული ტექნოლოგიებით შეიქმნება და მსოფლიო სტანდარტებზე იქნება ორიენტირებული.
„მეღვინეობა ჩვენი კულტურის და იდენტობის განუყოფელი ნაწილია. ეს არის ჩვენი 8 000-წლიანი მემკვიდრეობა. ეს არის ჩვენი წვლილი მსოფლიო ცივილიზაციაში და ამას განსაკუთრებულად უნდა გავუფრთხილდეთ. ვაჩნაძიანში ერთმანეთს ერწყმის ჩვენი უძველესი მეღვინეობის ტრადიციები და ახალი ტექნოლოგიები. მისასალმებელია მეცნიერულ ანალიზზე დაფუძნებული მიდგომა. სწორედ მეცნიერული ანალიზით შეირჩევა საძირეები, წვეთოვანი სარწყავი სისტემა, მიწისქვეშა მარანი ტემპერატურის კონტროლისთვის – ეს ტექნოლოგიები უზრუნველყოფს მაქსიმალური ხარისხის მიღწევას“, – განაცხადა პრემიერ-მინისტრმა.
ირაკლი კობახიძემ ხაზი გაუსვა ახალი ქარხნის მნიშვნელობას ადგილობრივი მოსახლეობის დასაქმების თვალსაზრისით და აღნიშნა, რომ მეღვინეობის მხარდაჭერა მთავრობის ერთ-ერთ უმთავრეს პრიორიტეტად რჩება.
„გასული წლების განმავლობაში ბევრი რამ გაკეთდა ამ დარგის მხარდასაჭერად სხვადასხვა ფორმით სახელმწიფოს მხრიდან და ეს მხარდაჭერა მომავალშიც გაგრძელდება. ჩვენ გვაქვს ძალიან კარგი ტენდენციები. მუდმივად იზრდება ეს დარგი ჩვენს ქვეყანაში. იზრდება წარმოება და მომავალშიც ყველაფერს გავაკეთებთ, რომ მევენახეობა-მეღვინეობას კიდევ უფრო მეტად შევუწყოთ ხელი. ჩვენი მრავალსაუკუნოვანი ტრადიციები უნდა გაგრძელდეს“, – განაცხადა პრემიერმა.
მეღვინეობა “ვაინ ერას” გახსნის ღონისძიების სტუმრებს სიტყვით მიმართეს პარლამენტის თავმჯდომარე შალვა პაპუაშვილმა, გარემოს დაცვისა და სოფლის მეურნეობის მინისტრმა დავით სონღულაშვილმა და კომპანიის დამფუძნებელმა გოჩა დარჩიაშვილმა.
პრემიერ-მინისტრმა, პარლამენტის თავმჯდომარესთან, აღმასრულებელი, საკანონმდებლო და ადგილობრივი ხელისუფლების წარმომადგენლებთან ერთად, “ვაინ ერას” მარანი დაათვალიერა.
