„ჰამასის“ ერთ-ერთი მაღალჩინოსნის, მუსა აბუ მარზუკის თქმით, პრეზიდენტ დონალდ ტრამპის მოთხოვნა მომდევნო 72 საათში გათავისუფლდნენ მძევლები, არარეალურია. მისი თქმით, „ჰამასი“ ძირითადად თანხმდება აშშ-ის პრეზიდენტის მიერ წარდგენილ 20-პუნქტიან გეგმას ღაზაში ომის დასასრულებლად, თუმცა აღნიშნავს, რომ მისი გარკვეული მოთხოვნები არარეალისტურია.
მუსა აბუ მარზუკის თქმით, „ჰამასს“ შუამავლებისთვის ადრეც განუცხადებია, რომ მათ არ აქვთ ინფორმაცია ყველა გარდაცვლილი მძევლის ცხედრების ადგილმდებარეობის შესახებ და მათ მოძიებას გარკვეული დრო დასჭირდება.
მუსა აბუ მარზუკი ასევე აღნიშნავს, რომ ამერიკულ გეგმაში წარმოდგენილი ხედვა ღაზაში ისრაელის ძალების ჩასანაცვლებლად საერთაშორისო სტაბილიზაციის ძალების განთავსებასთან დაკავშირებით, დაზუსტებას მოითხოვს. მაღალჩინოსანი ასევე აცხადებს, რომ „ჰამასი“ არ დაყრის იარაღს, ვიდრე ისრაელი არ დაასრულებს „ოკუპაციას“ და რომ ღაზის მომავალი პალესტინურ ეროვნულ სტრუქტურებთან უნდა იქნას განხილული, რომლის ნაწილიც იქნება „ჰამასი“.
აღსანიშნავია, რომ ვაშინგტონისეულ გეგმაში, „ჰამასის“ შემდგომი ჩართულობა პალესტინის ადმინისტრაციაში განხილვას არ ექვემდებარება.
ცნობისთვის, მანამდე, მედიაში გავრცელდა ინფორმაცია, რომ „ჰამასი“ ცეცხლის შეწყვეტაზე დონალდ ტრამპის სამშვიდობო გეგმას დათანხმდა.
აშშ-ის პრეზიდენტმა, დონალდ ტრამპმა ღაზის სამშვიდობო გეგმა ისრაელის პრემიერ-მინისტრ ბენიამინ ნეთანიაჰუსთან შეხვედრისას 29 სექტემბერს წარადგინა.