ნატოს ყოფილმა გენერალურმა მდივანმა იენს სტოლტენბერგმა განაცხადა, რომ 2018 წელს ალიანსის სამიტის დროს აშშ-ის პრეზიდენტის დონალდ ტრამპის სიბრაზის გამო ნატო კინაღამ დაიშალა. ინფორმაციას The Guardian-ი ავრცელებს.
როგორც ნატოს გენერალური მდივანი იხსენებს, იმ დროს თეთრი სახლის ლიდერი უკმაყოფილო იყო იმით, რომ მოკავშირეები ცოტას ხარჯავდნენ თავდაცვაზე, ხოლო ალიანსის შტაბ-ბინაზე დიდძალი ფული დაიხარჯა.
სტოლტენბერგის თქმით, მაშინ ტრამპმა განაცხადა, რომ აშშ მშპ-ის 4% თავდაცვაზე ხარჯავს და ნატოს ხარჯების 80-90% თავად ფარავს.
ამერიკის ლიდერმა გააფრთხილა პარტნიორები, რომ ამიერიდან აშშ გადაიხდის „იმდენს, რამდენსაც გერმანია“ და დასძინა, რომ აშშ-ს „ნატო არ სჭირდება“. გარდა ამისა, სტოლტენბერგთან საუბარში ტრამპი დაინტერესდა, თუ რაში სჭირდებოდა ალიანსს „ასეთი დიდი შტაბ-ბინა“. ის გაოცდა, როცა გაიგო, თუ რამდენი დაიხარჯა მის აშენებაზე.
„ახლა ყველაფერი ჩამოიქცევა, გავიფიქრე. გადავხედე დარბაზს. ყველა ლიდერს სერიოზული სახე ჰქონდა. ყველა ხვდებოდა, რომ ყველაფერი იშლებოდა – მთელი სამიტი, დეკლარაციები. თუ ამერიკის პრეზიდენტი იტყვის, რომ მას აღარ აქვს სურვილი დაიცვას სხვა მოკავშირეები და ტოვებს ნატოს სამიტს პროტესტის ნიშნად, ნატოს ხელშეკრულება და უსაფრთხოების გარანტიები აღარაფერს წარმოადგენდა. ვიფიქრე, რომ ამ შეხვედრაზე ნატო დაიშლებოდა“, – იხსენებს სტოლტენბერგი.