გერმანიის კანცლერმა ფრიდრიხ მერცმა განაცხადა, რომ ქვეყანაში ქალებისა და მამაკაცებისთვის სავალდებულო სამხედრო სამსახური უნდა აღდგეს. ინფორმაციას Bild-ი ავრცელებს.
„ვეჭვობ, რომ ის [სამხედრო სამსახური] აღარ იქნება ნებაყოფლობითი“, – ციტირებს გამოცემა მერცს.
როგორც Bild-ი აღნიშნავს, გერმანიაში სავალდებულო სამსახური 2011 წელს გაუქმდა.
მერცის განცხადებით, ბუნდესვერს დაახლოებით 80 ათასი სამხედრო მოსამსახურე აკლია, რათა ნატოს წინაშე აღებული ვალდებულება შეასრულოს და ჯარის რიცხოვნობა 260 ათასამდე გაზარდოს. გეგმის თანახმად, გერმანიაში სავალდებულო სამხედრო სამსახურის ხანგრძლივობა ერთ წელს უნდა შეადგენდეს. ამასთან ერთად, ადამიანებს შეეძლებათ იმსახურონ არა მხოლოდ ჯარში, არამედ სოციალურ ან სამოქალაქო სტრუქტურებშიც.
Bild-ი აღნიშნავს, რომ სავალდებულო სამხედრო სამსახურის აღდგენისთვის ქვეყნის კონსტიტუციაში ცვლილებების შეტანა იქნება საჭირო, რადგან დღეს მოქმედი რედაქციის თანახმად, ქალების არც გაწვევა, არც სამედიცინო კომისიაზე გაგზავნა შეიძლება.
„გვჭირდება, რომ ყველამ, ქალმაც და კაცმაც საზოგადოების წინაშე პასუხისმგებლობა აიღოს“, – დასძინა კანცლერმა.
მერცის იდეამ მმართველ კოალიციაში აზრთა სხვადასხვაობა გამოიწვია. თავდაცვის მინისტრი ბორის პისტორიუსი ნებაყოფლობითი სამხედრო სამსახურის შენარჩუნებას უჭერს მხარს გარკვეული ფინანსურ სტიმულების საშუალებით. სამხედრო სამსახურის შესახებ ახალი კანონის განხილვა გერმანიის ბუნდესტაგში ოქტომბრის შუა რიცხვებში გაიმართება.