გერმანიაში დახურულ კარს მიღმა საგარეო საქმეთა მინისტრის, იოჰან ვადეპულის შეცვლას განიხილავენ. ამის შესახებ „ბილდი“ აქვეყნებს ინფორმაციას.
„ბილდის“ ცნობით, იოჰან ვადეპულის შეცვლის საკითხზე დისკუსიებს ქვეყნის პრემიერ-მინისტრის ოფისში ოფიციალურად არ ადასტურებენ, თუმცა ჟურნალისტები ამტკიცებენ, რომ ასეთ შესაძლებლობას ქრისტიან-დემოკრატიულ კავშირში განიხილავენ.
საქმე ეხება ვადეპულის გამონათქვამებს, რომლებმაც მმართველი ფრაქციის რიგებში აურზაური გამოიწვია. კერძოდ, მან პარალელი გაავლო სირიაში სამოქალაქო ომის დასრულებასა და მეორე მსოფლიო ომის დასრულებას შორის.
„სირია უარესად გამოიყურება, ვიდრე გერმანია 1945 წელს“, – განაცხადა ვადეპულმა.
მედია ვადეპულის შემცვლელად ასახელებს ბუნდესტაგში ქრისტიან-დემოკრატიული და ქრისტიან-სოციალური კავშირის ფრაქციის ლიდერ იენს შპანს, რომელიც მანამდეც განიხილებოდა ქვეყნის საგარეო საქმეთა მინისტრობის კანდიდატად.
ასევე, საგარეო უწყების ხელმძღვანელი შესაძლოა, გახდეს ბუნდესტაგის საგარეო საქმეთა კომიტეტის თავმჯდომარე არმინ ლანშეტი.
კიდევ ერთ კანდიდატად სახელდება ევროპარლამენტის საგარეო საკითხთა კომიტეტის თავმჯდომარე დევიდ მაკალისტერი. თუმცა, მედია წერს, რომ მაკალისტერმა ერთხელ უკვე უთხრა უარი გერმანიის კანცლერს მთავრობაში მუშაობაზე.