ევროკომისიის სპიკერი გიომ მერსიე უკრაინაში კორუფციულ სკანდალს ეხმაურება. მერსიე აცხადებს, რომ ევროკომისია გააგრძელებს ვითარებაზე ყურადღებით დაკვირვებას.
„შევიტყვეთ ამბები ჩხრეკების შესახებ, რომლებიც უკრაინის ეროვნულმა ანტიკორუფციულმა ბიურომ და სპეციალიზებულმა ანტიკორუფციულმა პროკურატურამ ჩაატარეს, ასევე პრეზიდენტის ოფისის ხელმძღვანელის გადადგომის შესახებ. გვესმის, რომ გამოძიებები გრძელდება. კორუფციასთან ბრძოლა საკვანძოა ქვეყნის ევროკავშირში გაწევრიანებისთვის. ის მუდმივ ძალისხმევას საჭიროებს კორუფციასთან ბრძოლისა და კანონის უზენაესობის დაცვის ძლიერი შესაძლებლობის შესანარჩუნებლად. ევროკომისია გააგრძელებს ვითარებაზე ყურადღებით დაკვირვებას“, – აცხადებს მერსიე.
უკრაინის პრეზიდენტის ოფისის ხელმძღვანელმა ანდრეი ერმაკმა გადადგომის შესახებ განცხადება გუშინ დაწერა.
მანამდე უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის წარმომადგენლებმა ანდრეი ერმაკის სახლში ჩხრეკა ჩაატარეს. ამასთან დაკავშირებით, ერმაკმა Telegram-ზე დაწერა, რომ ის სამართალდამცველებთან თანამშრომლობს.