„უმძიმესი დანაშაულია. უნდა დაველოდოთ, რა კვალიფიკაციას მიანიჭებს ამას სამართალდამცავი უწყება,”- ამის შესახებ საპარლამენტო ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა კოალიცია „ძლიერი საქართველო – ლელოს” ერთ-ერთი ლიდერის, ალექსანდრე ელისაშვილის დაკავებაზე საუბრისას განაცხადა.
მისივე თქმით, ელისაშვილი არის ჩვეულებრივი კრიმინალი.
„რა თქმა უნდა, ეს უმძიმესი დანაშაულია. უნდა დაველოდოთ, რა კვალიფიკაციას მიანიჭებს ამას სამართალდამცველი უწყება. ამ ყველაფერში დამნაშავე არიან ის ევრობიუროკრატები, ის ელჩები, რომლებიც ახალისებენ ძალადობას საქართველოში. თუმცა, ამ კონკრეტულ შემთხვევაში ძალიან საინტერესოა, თუ ვისი მითითებით მოქმედებდა ბატონი ელისაშვილი, რომელიც ჩვეულებრივი აგენტია. არის სამი სახის აგენტი: არის სასარგებლო იდიოტი, არის აგენტი, რომელიც ფულს იღებს და არის აგენტი, რომელზეც კომპრომატები გააჩნიათ.
არა მგონია, ელისაშვილი სასარგებლო იდიოტი იყოს და საინტერესოა, დანარჩენი ორი ოფციიდან, რომელმა აიძულა იმ ნაბიჯის გადადგმა, რა ნაბიჯიც მან გადადგა და ბატონი ელისაშვილი არის ჩვეულებრივი კრიმინალი“, – განაცხადა მაჭავარიანმა.
შეგახსენებთ, შსს-ს ინფორმაციით, დაკავებულია კოალიცია „ძლიერი საქართველო – ლელოს” ერთ-ერთი ლიდერი, ალექსანდრე ელისაშვილი, რომელმაც დღეს დილით, გამთენიისას, თბილისის საქალაქო სასამართლოს კანცელარიის შენობის დაწვა სცადა.