ძალიან დაბალია იმის ალბათობა, რომ მთელ ქვეყანას გაუჩერონ ვიზალიბერალიზაცია. ამდენი დატესტვის მიუხედავად, მათ დაინახეს, რომ რადიკალებს, მათ აგენტურასა და მდიდარ „ენჯეოებს“ ფიზიკურად არაფრის შნო არ გააჩნიათ და მოსახლეობის მხრიდან არანაირი მხარდაჭერა არ აქვთ, – განაცხადა „დღის ქრონიკაში“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა რუსთაველის გამზირზე მიმდინარე საპროტესტო აქციების შეფასებისას.
მისივე თქმით, აქციებს არაფერი შეუცვლია. მაჭავარიანმა ასევე ისაუბრა მანიფესტზე, რომელიც მედიაში გავრცელებული ინფორმაციით, ბრიუსელთან იყო შეთანანხმებული და ოპოზიციას გუშინდელ აქციაზე უნდა წაეკითხა. თუმცა, ინფორმაციის გავრცელების შემდეგ რადიკალებმა „მანიფესტი“ აღარ წაიკითხეს.
„რა თქმა უნდა, „მანიფესტი“ არსებობდა, მაგრამ იქიდან გამომდინარე, რომ მოხდა ამ ინფორმაციის გაჟონვა – გახსოვთ, დაახლოებით, 2 კვირის წინ ანალოგიური დაემართათ, როდესაც ბრიუსელიდან გამოგზავნილი წერილი წაიკითხეს, სადაც მძიმე-წერტილის შეცვლის უფლებაც კი არ მისცა ბრიუსელმა და არ სურდათ, აღმოჩენილიყვნენ ანალოგიურ, უხერხულ მდგომარეობაში. აქედან გამომდინარე, მანიფესტის წაკითხვა გადაიფიქრეს“, – განაცხადა მაჭავარიანმა.
მისივე თქმით, რადიკალებმა არ იკმარეს, რომ წლების განმავლობაში უშვერი სიტყვებით ლანძღავდნენ დონალდ ტრამპს და მას რუსეთის აგენტს უწოდებდნენ, მომავალშიც ისინი აპირებენ იგივე დღის წესრიგი გააგრძელონ.
„კონკრეტულად ევრობიუროკრატებზე რაც შემიძლია ვთქვა, ისინი ტესტავენ სიტუაციას საქართველოში. მათთვის 13 სექტემბერი იყო ერთგვარი ტესტი, 4 ოქტომბერი, 28 ნოემბერი იყო ერთგვარი ტესტი და ამით ისინი ზომავენ, თუ რამდენად შეუძლიათ მათ აგენტურას, რადიკალურ ოპოზიციასა და მდიდარ „ენჯეო“ სექტორს, ჩვენი მოქალაქეების აყოლიება, მაგრამ ყოველ ჯერზე რწმუნდებიან, რომ მათი აგენტები საქართველოში ბოლომდე გამარგინალებულები არიან“, – აღნიშნა მაჭავარიანმა.
მისივე თქმით, აღნიშნული გარე ძალები, რომლებიც დაინტერესებული არიან ხელისუფლების ცვლილებითა და ხელისუფლებაში აგენტების მოყვანით, ვერ დარწმუნდნენ, რომ კანდიდატის სტატუსის არმოცემით ქვეყანაში რევოლუცია მოხდებოდა.
„ზუსტად ანალოგიურს ვადევნებთ ახლა თვალს, თუ ისინი დარწმუნდებიან, რომ ვიზის შეჩერებით, მე ქვეყანაზე მაქვს საუბარი და მთლიანად მოქალაქეებზე, ქართველების დასჯით, აქ მოხდება რევოლუცია და 90-იანი წლების განმეორება, მაშინ ისინი, რა თქმა უნდა, შეაჩერებენ ვიზას. თუ ისინი ვერ დარწმუნდებიან, მაშინ კონკრეტულ ჯგუფებზე იქნება ვიზის შეჩერება. ძალიან დაბალია იმის ალბათობა, რომ მთელ ქვეყანას გაუჩერონ, იქიდან გამომდინარე, რომ ამდენი გატესტვის მიუხედავად, მათ დაინახეს, რომ რადიკალებსა და მათ აგენტურასა და მდიდარ „ენჯეოებს“ ფიზიკურად არაფრის შნო არ გააჩნიათ და ქვეყანაში მოსახლეობის მხრიდან არანაირი მხარდაჭერა არ აქვთ“, – აღნიშნა მაჭავარიანმა.