მთლიან დავას გაეცა საბოლოო პასუხი და დადგინდა, რომ ეს იყო 21-ე საუკუნის ერთ-ერთი გახმაურებული ყაჩაღობა საფინანსო თუ სახელმწიფოებრივი ინსტიტუტების გამოყენებით, – განაცხადა გადაცემაში „იმედი კვირა” საქართველოს პარლამენტის თავმჯდომარემ შალვა პაპუაშვილმა. იგი ამგვარად აფასებს გაერთიანებული სამეფოს უზენაესი სააპელაციო სასამართლოს გადაწყვეტილებას, რომლის მიხედვითაც, „ქართული ოცნების“ დამფუძნებელმა და საპატიო თავმჯდომარემ, „კრედიტ სუისს“ დავა მოუგო.
შალვა პაპუაშვილის განცხადებით, სამიზნე იყო არა ბიძინა ივანიშვილი, როგორც ინდივიდი, არამედ ბიძინა ივანიშვილი, რომელზე გავლენაც სჭირდებოდათ იმისთვის, რათა მისი გავლენით საქართველოს ხელისუფლება გარკვეულ საკითხებზე დაეყოლიებინათ.
„ამით კიდევ ერთხელ ვნახეთ, რომ არანაირი კანონის უზენაესობა ღირებულებად არ რჩება, როდესაც არაფორმალურ მმართველობას აქვს მისაღწევი გარკვეული მიზნები. ამ დროს მთელი ევროპული ინსტიტუტები ორკესტრირებულად მოიმართებიან იმისთვის, რომ ოლიგარქიული მმართველობისგან მიღებული დავალებები შეასრულონ.
ფაქტია, რომ აქ სამიზნე არ იყო ბიძინა ივანიშვილი, როგორც ინდივიდი, არამედ ბიძინა ივანიშვილი, რომელზე გავლენაც სჭირდებოდათ იმისთვის, რომ მისი პოლიტიკური, საზოგადოებრივი გავლენით საქართველოს ხელისუფლება დაეყოლიებინათ რაღაც საკითხებზე, მათ შორის ბიძინა ივანიშვილს მიეღო ისეთი გადაწყვეტილებები, რომელიც დააზიანებდა საქართველოს. ამ მხრივ ჩვენ ვნახეთ, უკრაინაში ომის დაწყების შემდეგ რამხელა ზეწოლა მოდიოდა თავად ბიძინა ივანიშვილზე და საქართველოს ხელისუფლებაზე”, – განაცხადა პარლამენტის თავმჯდომარემ.
პაპუაშვილს მიაჩნია, რომ გაერთიანებული სამეფოს უზენაესი სააპელაციო სასამართლოს გადაწყვეტილების მიუხედავად, პოლიტიკური ინტერესის გაქრობამდე, საქართველოს წინააღმდეგ ამ ბერკეტს ხელიდან არ გაუშვებენ.
„არის გადაწყვეტილება, თუმცა, ვნახეთ განცხადება ბიძინა ივანიშვილის ადვოკატების მხრიდან, რომ არანაირი მოლოდინი არ არსებობს, რომ ამ გადაწყვეტილებას კეთილსინდისიერად აღასრულებენ. პოლიტიკური ინტერესი ვიდრე არ გაქრება ან არ შემცირდება საქართველოს წინააღმდეგ, მანამდე ამ ბერკეტს როგორც ჩანს, ხელიდან ადვილად არ გაუშვებენ. ვიცით, რომ ამერიკის წინა არსებობს ადმინისტრაციის მიერ სრულიად აბსურდული საფუძვლით ბიძინა ივანიშვილის წინააღმდეგ შემოღებული შეზღუდვა. ვიცით, რომ ამერიკის შეერთებული შტატების ახალი ადმინისტრაცია, პრეზიდენტი ტრამპი წინა ადმინისტრაციას და პრეზიდენტ ბაიდენს, რომელმაც ეს შეზღუდვები დააწესა, უწოდებს „ავტოკალმის პრეზიდენტს“, რომელიც არა საკუთარი ნებით მოქმედებდა, არამედ იმართებოდა”, – განაცხადა პარლამენტის თავმჯდომარემ.
მისივე თქმით, საქართველოს კანონის უზენაესობაზე მორალური პიედესტალიდან ესაუბრებიან, თუმცა, იმავეს თავად არ ემორჩილებიან.
„შენ გესაუბრებიან რაღაც მორალური პიედესტალიდან კანონის უზენაესობაზე, ადამიანის უფლებებზე, ამ დროს თავად არ ემორჩილებიან ამას საერთოდ. როცა სჭირდებათ, ყველაფერს თელავენ და “ძალა აღმართს ხნავს” პრინციპით მოქმედებენ. ამაში ახალი არაფერია, ბიძინა ივანიშვილმაც იცის და ჩვენ ყველამ – მთელი ეს პროცესი ემსახურებოდა იმას, რომ როგორმე დაიყოლიონ ბიძინა ივანიშვილი საქართველოს წინააღმდეგ უცხო ძალების გეგმების თუ ნების განსახორციელებლად”, – განაცხადა შალვა პაპუაშვილმა.