თინა ბოკუჩავა მოსამართლეებს მოუწოდებს, პარტიების აკრძალვის შესახებ სარჩელი წარმოებაში არ მიიღონ და დაუშვებლად ცნონ. ნაციონალური მოძრაობის თავმჯდომარე ამბობს, რომ „ქართული ოცნების“ სარჩელი დაუსაბუთებელია და ვერ აკმაყოფილებს მტკიცებულების სტანდარტს. მისი განმარტებით, თუ სასამართლო სარჩელს წარმოებაში მაინც მიიღებს, „ნაციონალური მოძრაობა“ მოითხოვს, სხდომა ზეპირი მოსმენის გარეშე არ ჩატარდეს.
„გვინდა, მივმართოთ საქართველოს საკონსტიტუციო სასამართლოს მოსამართლეებს, არ მიიღონ ეს სამარცხვინო სარჩელი წარმოებაში და ის დაუშვებლად ცნონ. დაუსაბუთებელი სარჩელის წარმოებაში მიღება თავად სასამართლოს გაუქმების ტოლფასია“, – განაცხადა ბოკუჩავამ.
მმართველ გუნდში „ნაცმოძრაობას“ პასუხობენ. „ქართულ ოცნებაში“ აცხადებენ, რომ ბოკუჩავას განცხადება მორიგი პოპულიზმი და სიცრუის ტირაჟირებაა.