პეკინის დაზვერვამ Salt Typhoon გამოიყენა აშშ-ის კონგრესის წამყვანი კომიტეტების საკომუნიკაციო არხებზე წვდომის მისაღებად – ამის შესახებ Financial Times წერს. კერძოდ, გამოცემის ინფორმაციით, ჩინეთმა გატეხა აშშ-ის წარმომადგენელთა პალატის გავლენიანი კომიტეტების თანამშრომლების მიერ გამოყენებული ელექტრონული ფოსტის სისტემები, მასშტაბური კიბერ-სადაზვერვო კამპანიის ფარგლებში, რომელიც Salt Typhoon-ის სახელით არის ცნობილი.
“თავდასხმასთან დაკავშირებით ინფორმირებული წყაროების ცნობით, ჩინეთის დაზვერვამ წვდომა მოიპოვა წარმომადგენელთა პალატის ჩინეთის კომიტეტის ზოგიერთი თანამშრომლის, ასევე, საგარეო საქმეთა კომიტეტის, დაზვერვის კომიტეტის და შეიარაღებული ძალების კომიტეტის თანაშემწეების მიერ გამოყენებულ ელექტრონული ფოსტის სისტემებზე. შეტევები დეკემბერში დაფიქსირდა. ეს შეტევები ჩინეთის დაზვერვის სამსახურის, სახელმწიფო უსაფრთხოების სამინისტროს მიერ აშშ-ის საკომუნიკაციო ქსელების წინააღმდეგ მიმდინარე კიბერკამპანიის უახლესი ეპიზოდია. თავდასხმის შესახებ ინფორმირებულმა ერთ-ერთმა პირმა განაცხადა, რომ გაურკვეველია, ჰქონდა თუ არა MSS-ს წვდომა კანონმდებლების ელექტრონულ ფოსტაზე”, – აღნიშნულია სტატიაში.
იაპონური გაზეთი The Asahi Shimbun, “როიტერსზე” დაყრდნობით წერს, რომ აღნიშნული ინფორმაცია დაუყოვნებლივ ვერ დადასტურდა, ვინაიდან, თეთრ სახლს კომენტარი არ გაუკეთებია, ასევე, ჩინეთის საელჩომ ვაშინგტონში, ჩინეთის საგარეო საქმეთა სამინისტრომ და ოთხი კომიტეტის ოფისებმა, შესაბამის შეკითხვებს დაუყოვნებლივ არ უპასუხეს.
“ნოემბერში, სენატის სერჟანტმა კონგრესის რამდენიმე ოფისს აცნობა “კიბერინციდენტის” შესახებ, სადაც ჰაკერებს შესაძლოა წვდომა ჰქონოდათ არაპარტიულ კონგრესის ბიუჯეტის ოფისსა და სენატის ზოგიერთ ოფისს შორის კომუნიკაციაზე, რომელიც კანონმდებლებს ფინანსური კვლევის ძირითად მონაცემებს აწვდის. Salt Typhoon-ის ჰაკერული თავდასხმები დიდი ხანია აშფოთებს აშშ-ის სადაზვერვო საზოგადოებას. ასევე, სავარაუდოდ, ჰაკერებმა ჩაწერეს საუბრები, მათ შორის აშშ-ის გამოჩენილ პოლიტიკოსებსა და მთავრობის წარმომადგენლებს შორის. აშშ-ის ოფიციალურმა პირებმა ადრე განაცხადეს, რომ ჰაკერული ჯგუფი მზად არის, კრიტიკული ამერიკული ინფრასტრუქტურის პარალიზება მოახდინოს ჩინეთთან კონფლიქტის შემთხვევაში. თავის მხრივ, პეკინმა არაერთხელ უარყო ჰაკერული თავდასხმის უკან ყოფნა. გასული წლის დასაწყისში, აშშ-მა სანქციები დაუწესა სავარაუდო ჰაკერს, იინ კეჩენგს და კიბერუსაფრთხოების კომპანიას, სიჩუანს”, – წერს იაპონური გაზეთი.