რუსეთის შეიარაღებულმა ძალებმა უკრაინის ქალაქ ლვოვის დაბომბვისას, სავარაუდოდ, ზებგერითი ბალისტიკური რაკეტა „ორეშნიკი“ გამოიყენა. ინფორმაციას ქალაქის მერი ანდრეი სადოვი ავრცელებს.
„იყო, თუ არა ეს „ორეშნიკი“ – ჯერჯერობით უცნობია. ინფორმაციას სამხედროები მოგვაწვდიან. დაბომბილია კრიტიკული ინფრასტრუქტურის ობიექტი. ადგილზე მუშაობენ ყველა შესაბამისი სამსახურები. მიმდინარეობს ხანძრის სალიკვიდაციო სამუშაოები. დაშავებულთა შესახებ ინფორმაცია არ ვრცელდება. სამოქალაქო ობიექტები და საცხოვრებელი სახლები არ დაზიანებულა“, – დაწერა სადოვიმ.
ცალკე განცხადება გაავრცელა უკრაინის შეიარაღებული ძალების „დასავლეთის“ საჰაერო სარდლობამ. „საჰაერო მიზანი 13 ათასი კმ/სთ-ის სიჩქარით მოფრინავდა, ბალისტიკური ტრაექტორიით“, – აღნიშნულია განცხადებაში.
აღსანიშნავია, რომ ეს რუსეთის მიერ „ორეშნიკის“ გამოყენების მეორე შემთხვევაა. პირველად რუსულმა არმიამ ის 2024 წლის ნოემბერში უკრაინის ქალაქ დნიპროს დაბომბვისას გამოიყენა. ვერც მაშინ და ვერც ახლა უკრაინელმა სამხედროებმა აღნიშნული ბალისტიკური რაკეტის ჩამოგდება ვერ შეძლეს.