კიევის მერი ვიტალი კლიჩკო კიეველებს მიმართავს და მოუწოდებს, ვისაც შეუძლია უკრაინის დედაქალაქი დატოვოს.
როგორც უკრაინის დედაქალაქის მერი „ტელეგრამის“ საკუთარ არხზე წერს, გვიან ღამით რუსეთის მიერ განხორციელებული საჰაერო შეტევის შედეგად ქალაქში მრავალბინიანი სახლების უმეტესობა ელექტროენერგიისა და გათბობის გარეშეა დარჩენილი.
„კიევის მრავალბინიანი სახლების ნახევარი – თითქმის 6 ათასი – დედაქალაქის კრიტიკულ ინფრასტრუქტურაზე მტრის მიერ განხორციელებული შეტევის გამო გათბობის გარეშეა დარჩენილი. ქალაქში აგრეთვე შეფერხებებია წყალმომარაგებასთან დაკავშირებით“, – წერს კლიჩკო.
მისი განცხადებით, ქალაქის ხელისუფლება ყველაფერს აკეთებს, რათა პრობლემა მოგვარდეს. „თუმცა გასულ ღამეს კრიტიკული ინფრასტრუქტურის ობიექტებზე განხორციელებული კომბინირებული შეტევა ყველაზე მტკივნეული იყო“, – დასძინა მან.