აშშ-ის პრეზიდენტი დონალდ ტრამპი მიიჩნევს, რომ რუსეთის პრეზიდენტის, ვლადიმერ პუტინის დაკავება არ იქნება საჭირო ისე, როგორც ნიკოლას მადუროს შემთხვევაში მოხდა.
ჟურნალისტმა ტრამპს კითხვა დაუსვა უკრაინის პრეზიდენტის, ვოლოდიმირ ზელენსკის განცხადებასთან დაკავშირებით, სადაც ის ვენესუელის პრეზიდენტის, ნიკოლას მადუროს დაკავებაზე საუბრისას ამბობს: „დიქტატორებთან ასე მოპყრობა თუ შეიძლება, მაშინ აშშ-მა იცის, რა უნდა გააკეთოს ამის შემდეგ“.
კითხვაზე, ოდესმე გასცემდით ბრძანებას ვლადიმირ პუტინის დაკავების ოპერაციის ჩასატარებლად? ტრამპმა უპასუხა: „არ მგონია, რომ ეს აუცილებელი იქნება“.
„მე ყოველთვის შესანიშნავი ურთიერთობა მქონდა მასთან. ძალიან იმედგაცრუებული ვარ. რვა ომი მოვაგვარე. ვფიქრობდი, ეს იქნებოდა ერთ-ერთი ყველაზე ადვილი. გასულ თვეში მათ 31 000 ადამიანი დაკარგეს, მათ შორის ბევრი რუსი ჯარისკაცი. რუსეთის ეკონომიკა კი ცუდად მიდის. ვფიქრობ, საბოლოოდ მოვაგვარებთ ამას. ვისურვებდი, ეს უფრო სწრაფად გაგვეკეთებინა, რადგან ბევრი ადამიანი იღუპება და ძირითადად ჯარისკაცები. როგორც იცით, პრეზიდენტმა ბაიდენმა უკრაინას საბრძოლველად 350 მილიარდი დოლარი მისცა და ჩვენ ამ თანხას ვერასდროს დავიბრუნებდით, თუმცა მე დავდე გარიგება მის დასაბრუნებლად, ამიტომ ჩვენ დავიბრუნებთ მას, მაგრამ ბაიდენს ეს არ უნდა გაეკეთებინა. ეს ცუდი იყო. მე შევძელი ნატო-ს ხარჯები მშპ-ის 2%-დან 5%-მდე გაზრდა. ნატო-ს ბევრი ფული აქვს და ისინი ყველაფრისთვის იხდიან. ჩვენ ფულს არ ვკარგავთ. ვფიქრობ, ბევრ ფულს ვიღებთ, თუ დაფიქრდებით, რადგან ჩვენს სამხედრო აღჭურვილობას ვყიდით. ისინი ალბათ უკრაინას აძლევენ, მაგრამ ჩვენგან ნატო ყიდულობს სამხედრო აღჭურვილობას“, – განაცხადა ტრამპმა.