იურიდიულ საკითხთა საპარლამენტო კომიტეტის თავმჯდომარემ არჩილ გორდულაძემ გადაცემაში „დღის ქრონიკა“ კორუფციისგან თავისუფლების რეიტინგში საქართველოს პოზიცია შეაფასა. მისი თქმით, ევრო ეს არის ფაქტებზე დაყრდნობით შედგენილი რეიტინგი, რომელიც განსხვავდება ევრობიუროკრატების მხრიდან აღქმების შექმნის მცდელობისგან.
გორდულაძემ ევროკომისიის გაფართოების ანგარიშიც გაიხსენა, სადაც კორუფციასთან მიმართებაში უკრაინასა მოლდოვაზე ჩანაწერი არ იყო.
„აღქმების შექმნის მიზნით, სუვერენიტეტდაკარგული ქვეყნების წარმომადგენლები თუ ევრობიუროკრატები ყოველთვის ცდილობენ, რომ საქართველოზე ტყუილები გაავრცელონ, ამავდროულად დაფარონ მაგალითად, უკრაინაში, მოლდოვაში, სხვა ქვეყნებში არსებული საგანგაშო და სავალალო მდგომარეობა, ხოლო საქართველოზე პირიქით – დამაკნინებლად ისაუბრონ.
დაახლოებით ერთი თვის წინ იყო გაფართოების კომისიის ანგარიში, სადაც არაფერი იყო ნათქვამი არც მოლდოვაში და არც უკრაინაში კორუფციის კუთხით არსებულ მდგომარეობაზე. იმიტომ, რომ თუ ამ ანგარიშში ჩაიწერებოდა, რომ პირველ ადგილზეა უკრაინა და იქვეა მოლდოვაც, სადაც ყვავის კორუფცია, მექრთამეობა, სახელმწიფო ქონების დატაცება და იქვე გაკრიტიკებული იქნებოდა საქართველო, რა თქმა უნდა, ეს შეუსაბამოდ გამოჩნდებოდა.
ერთია პოლიტიკური ანგარიშები, რომლებშიც ვერასდროს მოხვდება ობიექტური მოცემულობა, ხოლო მეორე მხრივ, როდესაც არ არის პოლიტიკური ნაწილი და მხოლოდ ფაქტებზე დაყრდნობით უნდა დაიწეროს ანგარიში, ყოველთვის ვნახულობთ ხოლმე, რომ საქართველო არა მხოლოდ კორუფციის წინააღმდეგ ბრძოლის, არამედ კანონის უზენაესობის, ეკონომიკური წინსვლის თვალსაზრისით, სასამართლო სისტემისადმი და სახელმწიფო სტრუქტურებისადმი ნდობით ყოველთვის მოწინავე ადგილზეა.
საქართველო გადადგმული ნაბიჯებით და საკანონმდებლო ჩარჩოს დემოკრატიულობის თვალსაზრისით ყოველთვის წინ არის, ვიდრე ნებისმიერი კანდიდატი ქვეყანა და არაერთი ინდექსი არსებობს, სადაც ჩვენ წინ ვუსწრებთ ევროკავშირისა და ნატოს წევრ ქვეყნებს როგორც მაგალითად, ამ შემთხვევაში კორუფციის არარსებობის თვალსაზრისით“, – განაცხადა არჩილ გორდულაძემ.
კითხვაზე, რა არის საჭირო იმისთვის, რომ გაზომვად მონაცემებსა და აღქმებს შორის სხვაობა მინიმუმამდე შემცირდეს, გორდულაძემ უპასუხა, რომ საჭიროა, ევრობიუროკრატია მოეგოს გონს და სიმართლისადმი, სხვა ქვეყნებისადმი პატივისცემას დაუბრუნდეს.
„ევროკავშირის მოქმედი ბიუროკრატია უნდა დაუბრუნდეს იმ საწყისს, რომელიც ჰქონდა ევროკავშირს დაარსებისას. ეს მთავარი ღირებულება ქრისტიანული ღირებულებაა და მხოლოდ მას შემდეგ შეიცვლება დამოკიდებულება იმისთანებს ქვეყნის მიმართ. ჩვენ განსაკუთრებით ჩვენი ქვეყანა გვტკივა, ჩვენი ქვეყნის მიმართ უსამართლობაზე და ჩვენი ხალხის დასჯის მცდელობებზე ვაკეთებთ აქცენტს, ყოველთვის მხოლოდ ფაქტებზე ვსაუბრობთ და არავითარ აღქმებზე.
მსგავს დამოკიდებულებას ვხედავთ ზოგ შემთხვევაში ევროკავშირის წევრი ქვეყნების, მაგალითად უნგრეთის, სლოვაკეთის მიმართ. ვხედავთ, რომ ევროკავშირში არის გამოღვიძება საკუთარი ქვეყნის ინტერესების სასარგებლოდ მოქმედი ძალებისა და ეს მხოლოდ და მხოლოდ მოსასალმებელია. ჩვენც ამას ვამბობთ, რომ უპირველესი არის ქვეყნის სუვერენიტეტი და ინტერესი და შემდეგ არის სხვა დანარჩენი საკითხები“, აღნიშნა დეპუტატმა.