იტალიას მტრები ჰყავს, რომლებიც ოლიმპიური თამაშების წინააღმდეგ საპროტესტო აქციებს მართავენ, – ასე გამოეხმაურა იტალიის პრემიერ-მინისტრი ჯორჯია მელონი მილანში ოლიმპიურ სოფელთან გამართულ დემონსტრაციას, რომელიც პოლიციასა და დემონსტრანტებს შორის შეტაკებებით დასრულდა.
„ისინი საპროტესტო აქციებს მართავენ და ცდილობენ, ეს კადრები მსოფლიოში ტელეეკრანებზე მოხვდეს. სხვები სარკინიგზო კაბელებს ჭრიან, რათა მატარებლების მოძრაობა შეაფერხონ“, – აღნიშნა მელონიმ.
მანამდე იტალიის პოლიციამ განაცხადა, რომ შაბათს დივერსანტებმა ქალაქ ბოლონიასთან ახლოს სარკინიგზო ინფრასტრუქტურა დააზიანეს, რამაც მატარებლების მოძრაობა რამდენიმე საათით შეაფერხა. იტალიის საგარეო საქმეთა მინისტრის, ანტონიო ტაიანის განცხადებით კი, ოლიმპიური თამაშების დაწყებამდე რუსეთმა კიბერთავდასხმები განახორციელა, რომელიც იტალიამ წარმატებით მოიგერია.