ბრიტანეთის პრემიერ-მინისტრის, კირ სტარმერის მომავალი კითხვის ნიშნის ქვეშ დადგა აშშ-ში ყოფილი ელჩის, პიტერ მენდელსონის გარშემო აგორებული სკანდალის ფონზე, რომელიც სექსუალური დამნაშავის, ჯეფრი ეპშტეინის საქმეში ფიგურირებს, – წერს Bloomberg-ი.
სააგენტოს წყაროები საუბრობენ ლეიბორისტული პარტიის ხელმძღვანელობაში არსებულ დავებზე, ასევე იმაზე, რომ მაღალჩინოსნები ემზადებოდნენ სცენარისთვის, რომლის მიხედვითაც მინისტრები პირად საუბრებში სტარმერს გადადგომას მოსთხოვდნენ, ან გადადგომით დაემუქრებოდნენ, თუ ის პოსტს არ დატოვებდა.
კაბინეტის ერთ-ერთი მინისტრის თანაშემწემ აღნიშნა, რომ სტარმერის შანსები, კვირის ბოლომდე პოსტზე დარჩეს, 50/50-ზეა.
კვირას ცნობილი გახდა ბრიტანეთის პრემიერ-მინისტრის ადმინისტრაციის ხელმძღვანელის, მორგან მაქსვინის გადადგომის შესახებ.
ლეიბორისტული პარტიის რამდენიმე დეპუტატმა მაქსვინი აშშ-ში ელჩად ყოფილი ლეიბორისტი პერის, მენდელსონის დანიშვნაში დაადანაშაულა. დისკუსიებში ჩახედული პირის თქმით, სტარმერი რამდენიმე დღის განმავლობაში ფიქრობდა, შეძლებდა თუ არა საქმიანობის გაგრძელებას მაქსვინის გარეშე.
Bloomberg-ი წერს, რომ 2024 წლის არჩევნებში ლეიბორისტების დამაჯერებელი გამარჯვების იდეოლოგის დაკარგვა პრემიერ-მინისტრს დაუცველს ტოვებს იმ მომენტში, როდესაც მთავრობის იმედგაცრუებული წევრები ხელმძღვანელობაში ცვლილებებს ითხოვენ.
ამავდროულად, სააგენტო წერს, რომ სტარმერი პოსტზე შესაძლოა ჯანდაცვის მინისტრმა, ვეს სტრიტინგმა ან ყოფილმა ვიცე-პრემიერმა, ანჯელა რეინერმა შეცვალონ.