ჩვენ პასუხისმგებლობას ვიღებთ, რომ ჩვენს საქმიანობაში ვერავინ ნახავს ერთ კორუფციულ გადაცდომასაც კი – ამის შესახებ, საქართველოს პრემიერ-მინისტრმა ირაკლი კობახიძემ “რუსთავი 2-ის” ეთერში გამართულ “დებატებში” განაცხადა.
პრემიერის განცხადებით, ოპონენტებისთვის რთულია იმის აღიარება, რომ რეალურად, დანაშაულთან ბრძოლის სრულიად განსხვავებული პრაქტიკა დამკვიდრდა:
“ჩვენი ოპონენტებისთვის რთულია იმის აღიარება, რომ რეალურად დამკვიდრდა სრულიად განსხვავებული პრაქტიკა.
ჩადენილ დანაშაულთან ბრძოლა, ზოგადად კორუფციასთან ბრძოლა, მხოლოდ ერთი პატარა ნაწილია. როდესაც საუბარია პრივატრიზაციისპრაქტიკაზე, ჩვენ მარტივი რამ გადავწყვიტეთ – როდესაც ხდება სახელმწიფო ქონების გასხვისება, ამ შემთხვევაში, სახელმწიფო გარანტირებულად მაქსიმალურ მოგებას იღებს, რადგანაც ყველაფერი გადის აუქციონზე. დაარქვან ამას კლანებს შორის ბრძოლა, სისულელეა ხომ? რაც შეეხება მთავრობის აქტების გამჭვირვალობას, ჩვენ მივიღეთ გადაწყვეტილება ყველა აქტის გამჭვირვალობის თაობაზე, ესეც კლანებს შორის ბრძოლაა? თუ რა არის? იგივე, როცა საქმე ეხება ნეპოტიზმის პრაქტიკის აღმოფხვრას, ეს 60 მილიონი ბუნებრივია, არაფერ კავშირშია რაიმე შიდა ბრძოლასთან თუ დაპირისპირებასთან. შესაბამისად, 10 კომპონენტიდან ერთია წარსულში ჩადენილი დანაშაულებისთვის ადამიანების გასამართლების წილი კორუფციასთან ბრძოლაში. ჩვენ რომ გვნდომებოდა კორუფციული პრაქტიკის შენარჩუნება, არც აუქციონი გაიხსნებოდა, არც მთავრობის აქტები გახდებოდა გამჭვირვალე, არც ნარკოტიკული დანაშაულის წინააღმდეგ გაიშლებოდა ფართოდ ბრძოლა, არც ორგანიზებული დანაშაულის წინააღმდეგ, არც ენერგეტიკას შევეხებოდით და გავაგრძელებდით იმ პრაქტიკით მუშაობას, რაც მანამდე იყო დამკვიდრებული.
ერთი პატარა ნაწილია წარსულში ჩადენილი დანაშაულებისთვის ადამიანების პასუხისგებაში მიცემა, ყველაფერი დანარჩენია აქ მთავარი. რაც არის ჩამოყალიბებული იმ პრაქტიკის მიხედვით, ჩვენ პასუხისმგებლობას ვიღებთ, რომ ჩვენს საქმიანობაში ვერავინ ნახავს ერთ კორუფციულ გადაცდომასაც კი,” – აცხადებს ირაკლი კობახიძე.