საქართველოს ექსპრეზიდენტის ედუარდ შევარდნაძის ყოფილი მრჩევლის, თემურ ბასილიას საქმეზე სააპელაციო სასამართლო არსებით განხილვას 27 ივლისს განაგრძობს. პირველ სხდომაზე ბრალდებისა და დაცვის მხარის შესავალი სიტყვა მოისმინეს, მომდევნო სხდომაზე კი მოწმეთა დაკითხვა იგეგმება. სააპელაციო სასამართლოს ეს საქმე მას შემდეგ გადაეცა, რაც უზენაესმა სასამართლომ თემურ ბასილიას ბრალდების გადახედვაზე განჩინება მიიღო. სააპელაციო სასამართლოში თემურ ბასილიას ინტერესებს ადვოკატები _ არჩილ კაიკაციშვილი და გია ტაბლიაშვილი იცავენ. ,,ვერსია” თემურ ბასილიას ესაუბრა. გთავაზობთ შემოკლებით:
_ წინა ხელისუფლების მაინც, რომელი მაღალჩინოსანი დაგიპირისპირდათ?
_ ჩემს პოლიტიკურ დევნაში გადამწყვეტი როლი სააკაშვილმა შეასრულა. ეს პირადად მისი დავალება იყო, რაც სამართალდამცავმა ორგანოებმა _ პროკურატურამ და სასამართლომ აღასრულეს. ჩემი საქმე იმის ნათელი დადასტურებაა, რომ სააკაშვილის რეჟიმი სამართალდამცავ ორგანოებსა და სასამართლოს პოლიტიკური მოწინააღმდეგეებისა და არასასურველი პირების უკანონო დევნის ინსტრუმენტად იყენებდა. ხაზს ვუსვამ: ეს აშშ-ს ხელისუფლების მიერაა დადასტურებული!
_ თქვენი დევნის მიზეზი მხოლოდ ის გახდა, რომ პრეზიდენტ შევარდნაძის ეკონომიკური მრჩეველი იყავით?
_ რა თქმა უნდა, არა. სააკაშვილსა და ჩემს შორის დაპირისპირება 1997 წლიდან დაიწყო. ამის ერთ-ერთი პირველი გამოვლინება ეკონომიკის მაშინდელი მინისტრის, ლადო პაპავასა და ჩემი ერთობლივი პრესკონფერენცია გახდა, სადაც კონკრეტული ფაქტები მოვიყვანეთ, თუ როგორ უშლიდა ხელს ეკონომიკური რეფორმების გატარებას მოქალაქეთა კავშირის ე.წ. ახალგაზრდული ფრთა ანუ ჟვანია-სააკაშვილის ჯგუფი. მაგალითად, სწორედ მათი ინიციატივითა და ზედამხედველობით ჩამოყალიბდა მანკიერი, კრიმინალური სქემა, როდესაც მეწარმეების მიერ გადახდილი გადასახადები რეალურად სახელმწიფო ბიუჯეტში კი არა, არამედ, ჟვანია-სააკაშვილის ჯგუფის ,,შავ სალაროში” მიდიოდა.
წყარო: ვერსია