ჩვენ ყოველთვის ვამბობდით – როდესაც დადგება მომენტი, როცა სომხეთს მოუწევს არჩევანის გაკეთება ევრაზიულ ეკონომიკურ კავშირსა და ევროკავშირს შორის, ბუნებრივია, ამ არჩევანს გავაკეთებთ, – ასე უპასუხა სომხეთის საგარეო საქმეთა მინისტრმა, არარატ მირზოიანმა სააგენტო „ნიუსამის“ კორესპონდენტის კითხვას იმის შესახებ, თუ როგორ შეაფასებდა რუსეთის პრეზიდენტის, ვლადიმერ პუტინის განცხადებებს, რომ სომხეთმა უნდა გადაწყვიტოს, დარჩეს ევრაზიულ ეკონომიკურ კავშირში თუ „ცივილიზებულად მოითხოვოს განქორწინება“ და ევროკავშირის მიმართულებით წავიდეს.
„აქ ახალი არაფერია. ამ ეტაპზე ჩვენ ევრაზიული ეკონომიკური კავშირის წევრები ვართ და კავშირში საქმიანობას ვაგრძელებთ. ასევე საიდუმლო არ არის, რომ სომეხ ხალხს ევროპული მისწრაფებები აქვს. როცა გადაწყვეტილების მიღების დრო დადგება, მას მივიღებთ“, – განაცხადა მირზოიანმა.