სომხეთის პრემიერ-მინისტრმა ნიკოლ ფაშინიანმა განაცხადა, რომ რუსეთთან ურთიერთობებში არანაირ დაძაბულობას არ ხედავს და მსგავს მტკიცებებს ხელოვნური უწოდა.
„მე ვერანაირ დაძაბულობას ვერ ვხედავ, ეს ხელოვნური დაძაბულობაა. ჩვენი ურთიერთობები რუსეთთან ინსტიტუციურია და ურთიერთპატივისცემაზეა დამყარებული“, – განაცხადა პრემიერ-მინისტრმა საარჩევნო უბნის გარეთ რუსი რეპორტიორის კითხვაზე პასუხისას, მას შემდეგ, რაც საპარლამენტო არჩევნებზე საკუთარი არჩევანი დააფიქსირა.
ფაშინიანმა სომხეთში მოქმედი „ზოგიერთი პოლიტიკური ძალა“ სომხეთ-რუსეთის ურთიერთობებში დაძაბულობის შექმნის მცდელობაში დაადანაშაულა, თუმცა აღნიშნა, რომ ამ მცდელობებს შედეგი არ მოაქვს, რადგან მას პრეზიდენტ ვლადიმერ პუტინთან კარგი ურთიერთობა აქვს.
„სომხეთში მოქმედი გარკვეული ძალები ცდილობენ დაძაბულობა შექმნან სომხეთ-რუსეთის ურთიერთობებში. ეს დაძაბულობა იმ მარტივი მიზეზის გამო არ იქმნება, რომ მე ძალიან მჭიდრო ურთიერთობა მაქვს რუსეთის ფედერაციის პრეზიდენტთან“, – განაცხადა ფაშინიანმა.