“როგორც ჩანს, გვარამია ვერ გამოდის წარსულის გავლენებიდან და ვერ ეგუება მდგომარეობას, როდესაც მედია დამოუკიდებელია და მისი პარტია ვერ აკონტროლებს”, – ასე პასუხობს სამაუწყებლო კომპანია ”რუსთავი2”-ის გენერალურ დირექტორს ნიკა გვარამიას, ფრაქცია ”ქართული ოცნების” თავმჯდომარე მამუკა მდინარაძე.
როგორც მდინარაძე აცხადებს, გვარამია აგრძელებს ჟურნალისტებზე იერიშის მიტანას და მათ მიმართ შეურაცხმყოფელ განცხადებებს აკეთებს. მისივე თქმით, სახელმწიფო ყველაფერს აკეთებს მედიაპლურალიზმისა და თავისუფალი ფუნქციონირებისთვის.
”როგორც ჩანს, გვარამია ვერ გამოდის წარსულის გავლენებიდან. და ვერ ეგუება მდგომარეობას, როდესაც მედია დამოუკიდებელია და მისი პარტია ვერ აკონტროლებს. მან ძველი ტრადიციისამებრ დღეს კიდევ ერთხელ მიიტანა იერიში ჟურნალისტებზე და პრესკონფერენციის დიდი ნაწილი დამოუკიდებელი ტელევიზიის და ჟურნალისტების მძიმე შეურაცხყოფას მიუძღვნა.
ვადასტურებთ რა უდიდეს პატივისცემას თითოეული ჟურნალისტის, მათი პროფესიის, ზოგადად, თავისუფალი მედიის მიმართ, მთელი პასუხისმგებლობით შეგვიძლია ვთქვათ, რომ სახელმწიფო ყველაფერს აკეთებდა და მომავალშიც გააკეთებს მედიაპლურალიზმის და მედიასაშუალებათა მაქსიმალურად თავისუფალი ფუნქციონიონირებისთვის. სწორედ ამისი ნათელი მაგალითია ”რუსთავი2”, რომელიც მიუხედავად უდიდესი საგადასახადო დავალიანებისა, დღემდე აგრძელებს თავისუფლად მუშაობას”, – განაცხადა მამუკა მდინარძემ.
სამაუწყებლო კომპანია ”რუსთავი2”-ის გენერალური დირექტორის, ნიკა გვარამის განცხადებით, მმართველი გუნდი ცდილობს კომპნიას ბოლო, ფინანსური დარტყმა მიაყენოს, რითაც მაუწყებელი ფუნქციონირებას შეწყვეტს.