სომხეთის მთავრობა მობილური ტელეფონების IMEI-ნომრების რეგისტრაციის ერთიანი სისტემის შექმნას აპირებს. ინფორმაციას სომხური მედია ავრცელებს.
ინიციატივა მთავრობამ უკვე მოიწონა და ახალი რეგულაციის ამოქმედება 2027 წლის 1 იანვრიდან იგეგმება.
სომხეთის მთავრობის ინფორმაციით, მონაცემთა ახალი ბაზის შექმნის მიზანია, მობილური ტელეფონების უკანონო ბრუნვასთან ბრძოლა, კანონიერი იმპორტიორებისთვის თანაბარი და სამართლიანი პირობების შექმნა, მომხმარებლების დაცვა.
ამასთან, ზოგი ექსპერტი შიშობს, რომ ტელეფონების მონაცემების გარდა ერთიან ცენტრში სომხეთის მოქალაქეების პერსონალური ინფორმაციაც შეინახება, რაც ხელისუფლებას ადამიანების კონტროლს გაუადვილებს.
სომხეთის მთავრობაში აღნიშნულ ინფორმაციას კატეგორიულად უარყოფენ და აღნიშნავენ, რომ ერთიან ცენტრში მხოლოდ ტელეფონის 15-ნიშნა IMEI კოდი შეინახება.