საქართველოს საპატრიარქოს მოწოდების მიუხედავად, პარტია „ევროპული საქართველო“ აღმაშენებლის გამზირზე დაანონსებულ აქციას მაინც ჩაატარებს.
“აი პი ენ”-ის ცნობით, დაგეგმილ აქციასთან დაკავშირებით ცვლილებები არ არის. აქციის ორგანიზატორები კი მიმდებარე ტერიტორიაზე უკვე იკრიბებიან.
ამ დროისთვის თამარ მეფისა და აღმაშენებლის ქუჩების კვეთაზე უსაფრთხოების ზომები გამკაცრებულია. პერიმეტრს საპატრულო პოლიცია იცავს. ადგილზე მობილიზებულია სახანძრო-სამაშველო და სასწრაფო დახმარების ბრიგადები.
დღეს თბილისში, სახელწოდებით “არა რუსულ ფაშიზმს საქართველოში” აქციის გამართვას აღმაშენებლის გამზირზე “ევროპული საქართველო” გეგმავს. ეს აქცია 20:00 საათზე აღმაშენებლის მოედანზე გაიმართება. პარალელურად, აღმაშენებლის გამზირზევე, 19:00 საათისთვის კონტრაქცია დააანონსეს „ქართველთა მარშის“ წარმომადგენლებმა და მერიისგან ნებართვაც ითხოვეს, მერიამ მათ ურჩია აქცია სხვა ადგილას გაემართათ.
თბილისის მერიამ „ქართველთა მარშის“ წარმომადგენლებისთვის გაგზავნილი წერილი გამოაქვეყნა, სადაც განმარტავს, რომ საზოგადოებრივი წესრიგის დაცვის მიზნით, მერიას მიაჩნია, რომ ეს აქცია აღმაშენებლის გამზირის ნაცვლად სხვა ლოკაციაზე ან სხვა დროს უნდა ჩატარდეს. წერილში ასევე ნათქვამია, რომ 2017 წლის 17 ივლისს თბილისის მერიას წერილობით მიმართა ,,ევროპული საქართველო მოძრაობა თავისუფლებისათვის” პოლიტიკურმა გაერთიანებამ, მიმდინარე წლის 23 ივლისს, მარჯანიშვილის მოედანსა და აღმაშენებლის გამზირზე აქციის ჩატარებასთან დაკავშირებით.