ბელგიის მთავრობა მზარდი კრიტიკის წინაშე აღმოჩნდა მას შემდეგ, რაც ჯანდაცვის უწყებებმა გასული კვირის რეკორდული სიცხეები 1200-ზე მეტ დამატებით გარდაცვალებას დაუკავშირეს – ამ ფაქტმა ოპოზიციური პარტიები აიძულა, მთავრობის წევრები ქვეყნის ყველაზე მოწყვლადი მოქალაქეების დაცვის უუნარობაში დაედანაშაულებინათ, – წერს გამოცემა POLITICO.
ხუთშაბათს საღამოს კრიტიკის ტალღა „სოციალისტური“ პარტიის ლიდერმა, პოლ მანიემ წამოიწყო, მას შემდეგ რაც ჯანდაცვის სამინისტრომ დაადასტურა, რომ 18 ივნისიდან 29 ივნისამდე პერიოდში გარდაცვალების შემთხვევები 1222-ით გაიზარდა.
„1222 გარდაცვალება სიცხის ბოლო ტალღის დროს, სიკვდილიანობის 39%-იანი მატება და… ფედერალური მთავრობის მიერ გადადგმული 0 ნაბიჯი!“ – დაწერა მანიემ პლატფორმა X-ზე.
„კლიმატურმა და ჯანდაცვის კრიზისმა, რომელმაც ასობით ადამიანის სიცოცხლე იმსხვერპლა, მინისტრების ლეთარგია ვერაფრით დაარღვია“, – განაცხადა მანიემ.
ქვეყნის ჯანდაცვის სამინისტრომ ხუთშაბათს გავრცელებულ განცხადებაში აღნიშნა, რომ ამ პერიოდში ქვეყანაში გარდაცვალების შემთხვევების უპრეცედენტო ზრდა დაფიქსირდა. მათ შორის 530-ზე მეტი გარდაცვლილი 85 წელს გადაცილებული პირია, ხოლო 180-მდე – 65 წლამდე ასაკის. „სიცხის ტალღის დროს გარდაცვალების ასეთი მაჩვენებელი ჩვენი ქვეყნისთვის უპრეცედენტოა“, – დასძინა სამინისტრომ.