საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა გადაცემა „იმედის კვირაში“ საქართველო-ჩინეთის ურთიერთობებზე ისაუბრა. ვიცე-პრემიერის განცხადებით, პარტნიორული ურთიერთობების განვითარება გლობალურ მოთამაშეებთან, მათ შორის ჩინეთთან, საქართველოს ინტერესებშია და ქართული მხარე ამას არ აღიქვამს, როგორც არჩევანს პარტნიორებს შორის.
„ჩვენ არ ვუყურებთ ამ ურთიერთობებს, როგორც არჩევანს პარტნიორებს შორის. ჩვენთვის ეს არის პარტნიორული ურთიერთობების განვითარება სხვადასხვა მიმართულებით. მით უმეტეს, როდესაც საუბარია გლობალურ მოთამაშეებზე, რა თქმა უნდა, ჩვენი ქვეყნის ინტერესებშია, რომ ყველასთან მაქსიმალურად გვქონდეს კარგი და მჭიდრო ურთიერთობები. ამ თვალსაზრისით, ბუნებრივია, ჩვენი ინტერესები გვაქვს, თუნდაც ჩვენი ქვეყნის როლის გათვალისწინებით, ჩვენი ქვეყნის ეკონომიკური სიძლიერის განვითარების თვალსაზრისით. რა თქმა უნდა, ჩვენთვის მნიშვნელოვანია ეკონომიკური კავშირები გაძლიერდეს აღმოსავლეთით, მათ შორის, გაძლიერდეს ჩინეთთან ჩვენი თანამშრომლობა და პარტნიორობა,“ – აღნიშნა მაკა ბოჭორიშვილმა.
საგარეო უწყების ხელმძღვანელმა ყურადღება გაამახვილა ბოლო პერიოდში საქართველო-ჩინეთის ორმხრივი ურთიერთობების გაღრმავებასა და ჩინეთთან კავშირების მნიშვნელობაზე.
„ბოლო პერიოდში, ჩვენი ურთიერთობა კიდევ უფრო სხვა ეტაპზე გადავიდა, რაც მნიშვნელოვნად შეუწყობს ხელს ორმხრივი ურთიერთობების გაძლიერებას ჩინეთთან. მნიშვნელოვანი მოთამაშეა დღევანდელ მსოფლიოში და, რა თქმა უნდა, ჩვენს ინტერესში უნდა იყოს, რომ გვქონდეს კარგი ურთიერთობა და განვითარებული კავშირები ჩინეთთან,“ – აღნიშნა საგარეო საქმეთა მინისტრმა.