საპარლამენტო უმრავლესობის წევრი, „ქართული ოცნების” რეგიონული მდივანი, დიმიტრი სამხარაძე, სოციალურ ქსელში ბიძინა ივანიშვილისა და მისი ოჯახის მისამართით გავრცელებულ მორიგ კრიტიკას ეხმიანება და აცხადებს, რომ საზოგადოებისთვის ცნობილი პირები, რომლებიც მუდმივ რეჟიმში “ქართული ოცნების” კრიტიკაში არიან, კვლავ იღებენ დაფინანსებას ივანიშვილის მიერ დაფუძნებული ფონდიდან.
დიმიტრი სამხარაძის განცხადებით, აღნიშნულ საკითხთან დაკავშირებით ბიძინა ივანიშვილის პოზიცია შემდეგია: „ამ ხალხის ღვაწლი, ქვეყნის აღიარებაში შეტანილი წვლილი დასაფასებელია. როდესაც შესაძლებლობა გაქვს, უნდა დაეხმარო. მთავარი ეს არის და არა მისი პოლიტიკური გემოვნება.“
სამხარაძის თქმით, ეს კიდევ ერთი დასტურია იმისა, თუ როგორ განსხვავდება და რამდენად დიდი სამშობლოს გამყიდველებზე, ერისკაცი ბიძინა ივანიშვილი.
“მივლინებაში ვიყავი და ძალიან მაგარი კახელი ძია კაცი გავიცანი. რა თქმა უნდა, პოლიტიკაზეც ვისაუბრეთ. მითხრა: „უმადური კაცი ყველაზე დიდი ცოდვაა, მაგრამ თუ ორი უმადური ერთმანეთს გადაეყრება, მათზე საზიზღარი არავინ იქნებაო“. რამდენიმე დღის წინ უნახავს ნაცური ტელევიზიის მორიგი სიუჟეტი, სადაც ბატონი ბიძინა ივანიშვილისა და მისი ოჯახის მიერ გაკეთებული სიკეთის გაშავებას ცდილობდნენ. კულტურის, სპორტისა და ზოგადად ქვეყნის საზოგადო მოღვაწეებს ურეკავდნენ და უხერხულ კითხვებს უსვამდნენ იმის შესახებ, თუ რატომ იღებენ დაფინანსებას ერისკაცის მიერ დაფუძნებული ფონდიდან.
სახელებსა და გვარებზე საუბარს არ ვაპირებ, თუმცა ფაქტია, რომ ცალკეული პირები, რომლებიც დღეს ქართულ ოცნებას უსამართლოდ აკრიტიკებენ და საზოგადოების შეცდომაში შეყვანას ცდილობენ, კვლავაც დიდი სიამოვნებით იღებენ დაფინანსებას ერისკაცის მიერ დაფუძნებული ფონდიდან. იცით, რა მინდა გითხრათ? ვინც ახლოს იცნობს ერისკაცს, არ გაუკვირდება, რომ ასე ხდება. მეც მქონდა შესაძლებლობა მეკითხა, რატომ ხდება ისე, რომ ვიღაც უსამართლოდ გწამებს ცილს, აგენტურის მიტინგებზე კეკლუცობს, ხოლო ფონდი მაინც აგრძელებს მის დაფინანსებას. პასუხი ისეთი მივიღე, როგორიც მხოლოდ სამშობლოს მოყვარე და პატრიოტ ადამიანს შეუძლია გასცეს:„ამ ხალხის ღვაწლი, ქვეყნის აღიარებაში შეტანილი წვლილი დასაფასებელია. როდესაც შესაძლებლობა გაქვს, უნდა დაეხმარო. მთავარი ეს არის და არა მისი პოლიტიკური გემოვნება.“
აი, ეს არის განსხვავება. ეს არის ქართული სულისკვეთება, პატრიოტიზმი და კიდევ ერთი მტკიცებულება იმისა, რამდენად დიდია თქვენზე, ერის გამყიდველებო, ერისკაცი ბიძინა ივანიშვილი. ეს არის ნათელი მაგალითი იმისა, რას ნიშნავს გიყვარდეს საკუთარი სამშობლო და საკუთარი ხალხი. მართალი კაცის დამარცხება გინდათ? ვერ ეღირსებით! ჭეშმარიტებასა და სიკეთეს თქვენი მდაბიო სიუჟეტებით ვერ გადაფარავთ. საზოგადოება ყველაფერს ხედავს და შესაბამის პასუხსაც გაგცემთ.
ნეტავ იცოდეთ, იმ კახელმა კაცმა როგორ შეგამკოთ და რა შთაბეჭდილება აქვთ თქვენს მიმართ ხალხს. ბოლოს კი იმასაც გეტყვით, რომ ის ორი ერთმანეთზე გადაყრილი უმადური და მათნაირები ვერასოდეს იტყვიან, თითქოს ვინმეს მათთვის ოდესმე ეთხოვოს ბატონი ბიძინას ან ქართული ოცნების სასარგებლოდ ემოქმედათ. მსგავსი ფაქტის ვერც ერთ მაგალითს ვერავინ მოიყვანს!!
მეამაყება, რომ ერისკაცის გუნდის წევრი ვარ და პირადად ყოველთვის დავიცავ ყველა იმ სიკეთეს, რაც ბატონ ბიძინას და მის ოჯახს საქართველოსთვის გაუკეთებიათ. სიმართლეს ყოველთვის წინ დავუყენებ ყველა ცრუპენტელასა და საზოგადოების შეცდომაში შემყვანს.”- წერს სამხარაძე.