სამტრედია-გრიგოლეთის ჩქაროსნული ავტომაგისტრალის მე-3 მონაკვეთის გახსნა კიდევ ერთი დასტურია იმისა, რომ საქართველოში ჩქაროსნული ავტომაგისტრალები სწრაფი ტემპით შენდება და ვითარდება და ჩვენი მიზანია, ეს საქმე სწრაფ ტემპშივე მივიყვანოთ ბოლომდე, – ამის შესახებ საქართველოს პრემიერ-მინისტრმა ირაკლი კობახიძემ სამტრედია-გრიგოლეთის ჩქაროსნული მაგისტრალის ახალი მონაკვეთის გახსნის ღონისძიებაზე სიტყვით გამოსვლისას განაცხადა.
მთავრობის მეთაურმა აღნიშნა, რომ ავტომაგისტრალების მშენებლობა მთელი ქვეყნის მასშტაბით აქტიურად გრძელდება და დღეს უკვე ექსპლუატაციაშია მიღებული 389 კილომეტრი ჩქაროსნული ავტომაგისტრალი, ხოლო 60 კილომეტრზე სამუშაოები სწრაფი ტემპით გრძელდება.
“2012 წლამდე მთლიანად საქართველოში მხოლოდ 68 კმ ჩქაროსნული ავტომაგისტრალი იყო აშენებული და ისიც – ყველაზე მარტივი მონაკვეთი. სამტრედია-გრიგოლეთის ავტომაგისტრალის სამუშაოები მომავალ წელს დასრულდება და მთლიანად იქნება აშენებული 52 კილომეტრი. ახალი გზით ჩვენ გვერდს ვუვლით საკმაოდ მჭიდროდ დასახლებულ ზონას. შედეგად, მგზავრობის დრო თითქმის მესამედით მცირდება, იზრდება უსაფრთხოება და გადაზიდვების ეფექტიანობა. აქტიურად გაგრძელდება მთელი ქვეყნის მასშტაბით ავტომაგისტრალების მშენებლობა. წელსვე გაიხსნება გრიგოლეთი-ქობულეთის დარჩენილი ნაწილი. ქვეშეთი-კობის ისტორიული პროექტის ფარგლებში – გუდაურამდე მისასვლელი გზა. უკვე გამოცხადებულია საერთაშორისო ტენდერი თბილისის 49-კილომეტრიან შემოვლით გზაზე და ბათუმი-სარფის მაგისტრალზე. ეს არის უმნიშვნელოვანესი პროექტები, რომლებიც ქვეყანაში გამტარუნარიანობას მნიშვნელოვნად გაზრდის”, – განაცხადა ირაკლი კობახიძემ.
პრემიერ-მინისტრის თქმით, უახლოეს მომავალში დაიწყება კახეთის მიმართულების, ჩრდილოეთ-სამხრეთის დერეფნის დარჩენილი მონაკვეთების და ანაკლიის პორტთან მისასვლელი გზის მშენებლობა.
“მთლიანობაში ჩვენი გეგმა არის ძალიან ამბიციური – 2031 წლისთვის გვინდა თითქმის ყველა მონაკვეთის მთლიანად დასრულება. დარჩენილი იქნება მხოლოდ 1 მონაკვეთი, რომელსაც იქიდან 1 წელიწადში ასევე მივიყვანთ ბოლომდე. ამ პროცესებს აქვს განსაკუთრებული მნიშვნელობა, ეკონომიკური თვალსაზრისითაც, ჩვენი ერთ-ერთი უმთავრესი ამოცანაა ქვეყნის სატრანზიტო, დაკავშირებადობის ფუნქციის განვითარება და ჩქაროსნული ავტომაგისტრალების მშენებლობა ამ კუთხით განსაკუთრებულ როლს ასრულებს. ეს ყველაფერი არის იმ საერთო გეგმის ნაწილი, რომელიც დაკავშირებულია სატრანზიტო რესურსების განვითარებასთან. ჩვენ ასევე გეგმაში გვაქვს საერთაშორისო აეროპორტების შესაძლებლობების გაფართოება. 2031 წლისთვის თბილისში გვექნება სრულიად ახალი საერთაშორისო აეროპორტი, მანამდე მნიშვნელოვნად გაფართოვდება ქუთაისის საერთაშორისო აეროპორტის შესაძლებლობები და მისი გამტარუნარიანობა, იგივე ეხება ბათუმის აეროპორტს“, – განაცხადა ირაკლი კობახიძემ.
პრემიერ-მინისტრმა ყურადღება ასევე გაამახვილა რკინიგზისა და პორტების განვითარების მიმართულებით მიმდინარე და დაგეგმილ პროექტებზე.
“დავასრულეთ რკინიგზის მოდერნიზაციის პროცესი, ასევე, გავხსენით ბაქო-თბილისი-ყარსის რკინიგზა და ბევრი მიმართულებით ხორციელდება ცვლილებები, რაც საქართველოს რკინიგზის რესურსებს მნიშვნელოვნად გაზრდის. ასევე, აქტიურად წარიმართება პორტების განვითარების პროცესი, ანაკლიის პორტის მშენებლობა. ყველაფერი კეთდება, რომ ჩვენი ქვეყანა თვისებრივად ახალ ეტაპზე გადავიდეს ამ რამდენიმე წელიწადში. გარდა ეკონომიკური დატვირთვისა, ჩქაროსნულ გზებს აქვს მნიშვნელოვანი სოციალური დატვირთვაც. ბუნებრივია, გზები უფრო მეტად აახლოებს ერთმანეთთან დასახლებებს და ეს ყველაფერი ქმნის განვითარების უკეთეს პირობებს ჩვენი თითოეული მოქალაქისთვის”, – აღნიშნა პრემიერმა.
მთავრობის მეთაურმა ინფრასტრუქტურის მინისტრ რევაზ სოხაძეს, მშენებლებს, ინჟინრებსა და საერთაშორისო პარტნიორებს, მათ შორის ევროპის საინვესტიციო ბანკს, მადლობა გადაუხადა.
“მადლობა ინფრასტრუქტურის სამინისტროს, პირადად მინისტრ რევაზ სოხაძეს, არა მხოლოდ იმისთვის, რომ ეს პროექტი ბოლომდე წარმატებით მიიყვანა, არამედ იმისათვის, რომ ამ ერთი წლის განმავლობაში გასწორდა ყველა ხარვეზი, რაც სამინისტროს მენეჯმენტში იყო დაფიქსირებული. რეფორმები, რაც განხორციელდა სამინისტროში, უზრუნველყოფს პროექტების ხარისხიანობის თვალსაზრისით სამინისტროს მუშაობის გაუმჯობესებას, პროექტების სწრაფ ტემპში და ხარისხიანად შესრულებას“, – განაცხადა ირაკლი კობახიძემ.
მიმდინარე ინფრასტრუქტურული პროექტების შესახებ ისაუბრა ინფრასტრუქტურის მინისტრმა რევაზ სოხაძემ.
ღონისძიებაზე სიტყვით გამოვიდა მაგისტრანტი საბა სვანიძე, რომელიც ანაზღაურებადი სტაჟირების სამთავრობო პროგრამის ფარგლებში გავლილი სტაჟირების შემდეგ, საავტომობილო გზების დეპარტამენტში დასაქმდა.
ღონისძიებას საქართველოს მთავრობის და პარლამენტის წევრები, გურიის მხარეში სახელმწიფო რწმუნებული, ადგილობრივი ხელისუფლების, ბიზნესის წარმომადგენლები და ახალგაზრდები დაესწრნენ.
სამტრედია-გრიგოლეთის ჩქაროსნულ მაგისტრალზე მესამე, 12-კილომეტრიანი მონაკვეთის მშენებლობა დასრულდა და ავტოტრანსპორტის მოძრაობა სრულად გაიხსნა.
აღნიშნული მონაკვეთის პირველი, ლანჩხუთი-ლესას 6-კილომეტრიანი ნაწილი ავტოტრანსპორტისთვის 2025 წლის ბოლოს გაიხსნა, ხოლო ამ ეტაპზე ექსპლუატაციაში შევიდა დარჩენილი 6 კილომეტრიც.
პროექტის ფარგლებში აშენდა 12-კილომეტრიანი, 4-ზოლიანი ასფალტ-ბეტონის გზა, 6 სახიდე გადასასვლელი, 2 სატრანსპორტო კვანძი. სამტრედია-გრიგოლეთის ავტომაგისტრალის 52 კილომეტრიდან 42.5 კილომეტრზე მოძრაობა უკვე გახსნილია. დარჩენილი 9.5-კილომეტრიანი მონაკვეთის დასრულება 2027 წელს იგეგმება.
