“რაც შეეხება იმას, არის თუ არა საქართველო სეკულარული სახელმწიფო ? – დიახ, საქართველო არის სეკულარული სახელმწიფო, მაგრამ ამავდროულად საქართველოს კონსტიტუცია აღიარებს საქართველოს ეკლესიის განსაკუთრებულ როლს ისტორიაში“, – ეს განცხადება ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა, სოზარ სუბარმა, გადაცემაში „არჩევანი“ გააკეთა:
„ადამიანები იგონებენ საფრთხეებს, საიდან მოაქვთ ეს თემები არ ვიცი… საქართველოში რელიგია და სახელმწიფო ერთმანეთისგან მკაცრად გამიჯნულია. როცა ვლაპარაკობთ კლასიკური სეკულარულ სახელმწიფოზე და კლასიკურ სეკულარიზმზე, არის თუ არა საქართველო კლასიკური სეკულარიზმის მაგალითი? მსოფლიოში, ალბათ, თითზე ჩამოსათვლელია სახელმწიფოები, რომელსაც შეიძლება, დავარქვათ, რომ ეს არის კლასიკური სეკულარული სახელმწიფო, მაგრამ ეს სახელმწიფოები არის კლასიკური დემოკრატიული სახელმწიფოები და იქ რელიგია, ეკლესია და სახელმწიფო ერთმანეთს აძლიერებენ, ხელს უწყობენ და ერთმანეთთან წინააღმდეგობაში არ მოდიან. ეს არის საქართველოშიც,“ – განაცხადა სოზარ სუბარმა.
როგორ სუბარმა აღნიშნა, კლასიკური სეკულარული სახელმწიფოს მაგალითი მენშევიკების პერიოდში იქნებოდა, ხოლო მისი თქმით, ”არჩევანის” სტუდიაში სტუმრები ეკლესიის მხოლოდ ჩამორჩენილობასთან ასოცირებას ახდენენ. სუბარმა ოპოზიციური ძალის რამდენიმე წამომადგენელს „ბოლშევიკები“ უწოდა.
„რასაც თქვენი სტუმრები ლაპარაკობდნენ, ეს იყო კლასიკური ბოლშევიზმი. კლასიკური ბოლშევიზმის გარდა, არავინ არ ამბობს, რომ ეკლესია, თურმე, არის ჩამორჩენილობის სიმბოლო, ხოლო ინკვიზიცია, ჯორდანო ბრუნო, ჟანა დარკი, კოპერნიკი, ეს თემები დასძლია საზოგადოებამ და ამიტომ განვითარდა, თორემ ეკლესიას, თურმე, არაფერი როლი არ შეუსრულებია. პირიქით არის, ევროპული ცივილიზაცია არის ქრისტიანული ცივილიზაციიდან ამოსული. ადამიანის უფლებების თეორიაზე როცა ვსაუბრობთ, საფუძველი არის სწორედ ქრისტიანულ მოძღვრებაში“, – განაცხადა მინისტრმა.
სოზარ სუბარმა აღნიშნა, რომ გიორგი კვირიკაშვილი თავის განცხადებაში ოქროს შუალედის მიღწევას გულისხმობდა.
„რაც შეეხება იმას, არის თუ არა საქართველო სეკულარული სახელმწიფო ? – დიახ, საქართველო არის სეკულარული სახელმწიფო, მაგრამ ამავდროულად საქართველოს კონსტიტუცია აღიარებს საქართველოს ეკლესიის განსაკუთრებულ როლს ისტორიაში, და ამავდროულად საკონსტიტუციო შეთანხმება, რომელიც არის კონსტიტუციიის განუყოფელი ნაწილი, აღიარებს ეკლესიის განსაკუთრებულ როლს დღევანდელობაშიც. მათ შორის შეგვიძლია მოვიყვანოთ მაგალითად ისეთი მუხლი, რომელიც სხვათაშორის წინა ხელისუფლების პერიოდში იქნა მიღებული, რაც ითვალისწინებს იმას, რომ საქართველოს პატრიარქი არის ხელშეუვალი და ამ მხრივ საქართველოს კათოლიკოს პატრიარქი არის ყველაზე მეტად დაცული პიროვნება კანონისგან, ვიდრე უნდა იყოს რომელიმე სხვა, პრეზიდენტზეც, სასამართლოს თავმჯდომარეზეც, საკონსტიტუციო სასამართლოს თავმჯდომარეზეც, და ა.შ. იქ არის საუბარი ერთობლივი ქონების განკარგვის უფლებაზე ეკლესიისა და სახელმწიფოს მხრიდან, რომელიც შეიძლება მუზეუმებში იყოს თავმოყრილი და ა.შ. საგადასახადო შეღავათებზე და სხვა… ისევ გავიმეორებ, ის, რომ ეკლესიას აქვს განსაკუთრებული სტატუსი ეს არის აღიარებული, არამხოლოდ როგორც ისტორიული ფაქტი, არამედ თანამედროვეობაშიც. ამას ჩვენ ყველა აღვიქვამთ, როგორც ნორმალურ მოვლენას და ამ ვითარებაში ვცხოვრობთ. ვერც იმას ვერ გამოვრციხავთ, თუ რა როლს ასრულებს დღეს საქართველოს ეკლესია – საქართველოს პოლიტიკურ სივრცეში. თქვენ აიტაცეთ რატომღაც პრემიერის სიტყვები, და ყველამ ყურადღების მიღმა დატოვა პრეზიდენტის სიტყვები, თუმცა მანაც სნოში ვიზიტასას არსობითად იგივე თქვა“, – განაცხადა სოზარ სუბარმა და პრეზიდენტის მიმართვა წაიკითხა.