კომპანია „ფუდსერვისი“ სკანდალში ეხვევა. უვარგისი და ჯანმრთელობისთვის საშიში საკვები პროდუქტების გამო, „ჯორჯიან მანგანეზის“ დროებითი მმართველი იძულებული გახდა „ფუდსერვისთან“ სამწლიანი ხელშეკრულება გაეუქმებინა. ნიკოლოზ ჩიქოვანი, რომელიც „ჯორჯია მანგანეზში“ დაახლოებით სამი თვის წინ დროებით მმართველად დაინიშნა, კომპანიის თანამშრომლების კვების ხარისხით დაინტერესდა და არსებული დარღვევები სწორედ მან გამოავლინა.
ხელშეკრულება კომპანია „ფუდსერვისსა“ და „ჯორჯიან მანგანეზის“ ადმინისტრაციასთან სამი წლის წინ გაფორმდა. ის ჭიათურის მაღაროსა და ზესტაფონის ფეროშენადნობების ქარხნის თანამშრომლებს საკვები პროდუქტებით ამარაგებდა. ბოლო წლების განმავლობაში თანამშრომლები, მათ შორის მუშები და მაღაროელები უვარგისი საკვები პროდუქტების გამო უკმაყოფილებას გამოთქვამდნენ. ართცუ იშვიათად, იყო შემთხვევები, როდესაც უვარგისი საკვების მიღების შემდეგ მათ ჯანმრთელობის პრობლემები ექმნებოდათ.
კომპანიაში აცხადებენ, რომ კვებითი ინტოქსიკაციის ხშირი შემთხვევებიც იყო.
ტელეკომპანიის მიერ გავრცელებულ ფოტოებზე ასახულია, თუ რა საკვებით იკვებობდნენ კომპანიის თანამშრომლები.
„ცომი რომელსაც ბუზი და ჭიანჭველები ეხვევა, ე.წ. მაცივარი, სადაც გალურჯებული ხორცი დაბინძურებულ თაროებზე, დაბინძურებულ ჭურჭელში ინახება. იგივე ხორცი, ამჯერად დამუშავების პროცესში…გარემო აქაც იდენტურია – ანტისანიტარია და ბინძური ინვენტარი. შენახვის სახარბიელო პირობები არც რძის ნაწარმის შემთხვევაში შეიმჩნევა. ყველა ნაჩვენები კადრი ერთ სივრცეში, ერთი დღის განმავლობაშია გადაღებული“ – აღნიშნულია „იბერიას“ მიერ მომზადებულ სიუჟეტში.
„იყო შემთხვევები, როდესაც ჩვენს თანამშრომლებს ფაღარათი ჰქონდათ“, – ამბობს ერთ-ერთი მუშა.
ფაქტს, რომ თანამშრომლები უხარისხო საკვების გამო პრეტენზიას ხშირად გამოთქვამდნენ, „ჯორჯიან მანგანეზის“ დროებითი მმართველიც ადასტურებს.
„იყო შემთხვევაც, როდესაც თანამშრომლებმა უხარისხო საკვების მიღება გააპროტესტეს, მათ დადეს ინსტრუმენტები და მუშაობას თავი დაანებეს, საკმაოდ ლეგიტიმური იყო მათი ქმედება იმ დღეს… უხერხულიც არის იმის მოყოლა, რა ხდებოდა ცომში, ხორცში, მაცივრებში და ა.შ. ამ ყველაფრის გამო გავწყვიტეთ კონტრაქტი და შემოვიყვანეთ ახალი კომპანია. უკვე მოდის ჩვენამდე ინფორმაცია, რომ ახალი კომპანიით თანამშრომლები კმაყოფილები არიან“,- აცხადებს ნიკოლოზ ჩიქოვანი.
შეგახსენებთ, რომ „ფუდსერვისი“ სამი წლის განმავლობაში ემსახურებოდა, როგორც ზესტაფონის ფერადშენადნობთა ქარხნის, ისე ჭიათურის სამთო-გამამდრიდრებელი კომბინატის თანამშრომლებს. კომპანია დაახლოებით 5500 ადამიანის კვებაზეა პასუხისმგებელი.
„ფუდსერვისთან“ თანამშრომლობის შეწყვეტის შემდეგ კომპანიასთან სამართლებრივ დავას იწყებენ. სასამართლოში ხელშეკრულების პირობების დარღვევასთან დაკავშირებით უკვე შეტანილია სარჩელი. „ჯორჯიან მანგანეზის“ სარჩელის საფუძველზე „ფუდსერვისის” ქონების ნაწილს უკვე ყადაღა დაადეს.
კომპანია, რომელიც “ჯორჯიან მანგანეზის” თანამშრომლების კვებაზე იყო პასუხისმგებელი, სკანდალში ეხვევა – ნიკოლოზ ჩიქოვანმა “ფუდსერვისს” სასამართლოში უჩივლა
2017/07/29 10:44:53
კომენტარები
ნანახია: 1277 ჯერ