თურქეთის სამხრეთ ნაწილში, ანტალიის პროვინციის აქსუს რაიონში, ტყის ხანძრის ჩაქრობის სამუშაოები გრძელდება. ხანძარი 7 სექტემბერს, ქარაოზის დასახლების მიმდებარე ტერიტორიაზე გაჩნდა და ძლიერი ქარის გამო სწრაფად გავრცელდა. მოგვიანებით ცეცხლმა მეზობელ ქეფეზის რაიონშიც გადაინაცვლა.
ხანძრის გამო აქსუსა და ქეფეზის რაიონებში 254 სახლის ევაკუაცია გახდა საჭირო. გავრცელებული ინფორმაციით, კვამლისა და ხანძრის შედეგად 8 ადამიანი დაზარალდა, მათგან ორი საავადმყოფოში გადაიყვანეს.
მეხანძრეები ცეცხლს როგორც ხმელეთიდან, ისე ჰაერიდან ებრძვიან. სამუშაოებში ჩართულია 1 000-ზე მეტი ადამიანი, 165 სახანძრო მანქანა, 3 თვითმფრინავი და 9 ვერტმფრენი.
ამ დროისთვის ხანძრის სრულად ლოკალიზებისთვის სამუშაოები კვლავ მიმდინარეობს. ხანძრის გამომწვევი მიზეზი ჯერჯერობით უცნობია.
კომენტარები