უკრაინის შეიარაღებულმა ძალებმა 10 სექტემბრის ღამეს რუსეთის დაღესტნის რესპუბლიკაზე დრონებით იერიში მიიტანა. ინფორმაციას უკრაინული მედია ავრცელებს.
სოციალურ ქსელებში გავრცელებულ ვიდეოკადრებში ჩანს ხანძრის რამდენიმე კერა დაღესტნის დედაქალაქ მახაჩყალაში. რეგიონში ამ დროს საჰაერო განგაში იყო გამოცხადებული. წინასწარი ცნობებით, აფეთქებები ქალაქის პორტის მიმდებარე ტერიტორიაზე ისმოდა. მახაჩყალის პორტი კასპიის ზღვის სანაპიროზე მდებარეობს, წერს მედია.
ჯერჯერობით უცნობია, რა მასშტაბის ზიანი გამოიწვია თავდასხმამ და კონკრეტულად რა იყო მისი სამიზნე.
უკრაინა რეგულარულად ახორციელებს დარტყმებს რუსეთის სიღრმეში და ოკუპირებულ ტერიტორიებზე განთავსებულ სამხედრო და სანავთობო ინფრასტრუქტურაზე, რათა მოსკოვს ომის გაგრძელების შესაძლებლობები შეუზღუდოს, წერს მედია.
დაღესტნის რეგიონზე უკრაინულმა ძალებმა ბოლოს 24 აგვისტოს მიიტანეს იერიში. მაშინ, გავრცელებული ინფორმაციით, დარტყმის სამიზნე კომპანია Ozon-ის საწყობი გახდა, რის შედეგადაც, სავარაუდოდ, ორი თანამშრომელი დაშავდა.