ზვიად შალამბერიძე „დღის ქრონიკაში“ პრემიერ-მინისტრის განცხადებას გამოეხმაურა, რომლის მიხედვითაც გრანტების მართვის სააგენტო მილევად რეჟიმშია და წლის ბოლომდე დაიხურება. პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველი მოადგილის თქმით, სახელმწიფომ არასამთავრობო სექტორს შესთავაზა ალტერნატივა და საბიუჯეტო რესურსი სოციალური თუ აგრარული პროექტების დასაფინანსებლად, თუმცა მათ ამის ინტერესი არ აღმოაჩნდათ, რაც მათ რეალურ მოტივებზე მეტყველებს.
„ჩვენ არავინ აგვიკრძალავს. ამ [გამჭვირვალობის] კანონით უბრალოდ მოვუწოდეთ, რომ უფრო მეტად დეკლარირებული იყოს მათი თანხები. ისინი საუბრობენ, თითქოს ამ ნაბიჯით ისეთ პროექტებს ვაჩერებთ, რომლებიც ეხმარება, ფერმერებს, შშმ პირებს, ბავშვებს და ა.შ. ამის საპირისპიროდ გადავდგით ეს ნაბიჯი [გრანტების მართვის სააგენტოს შექმნა] – კი ბატონო, თუ ასე ხართ მოწადინებულები, რომ ასეთ ადამიანებს დაეხმაროთ, სახელმწიფო გაძლევთ საშუალებას და რესურსს, რომ შემოიტანოთ განაცხადები, დაგიფინანსებთ და განაგრძეთ. მაგრამ ამით უფრო მეტად გამოჩნდა, რომ მათი პირველადი მიზანი არ იყო მოსახლეობის დახმარება, ჩვენი საზოგადოების სოციალური მდგომარეობის გაუმჯობესება. ეს იყო უბრალოდ შეფუთვა. სამწუხაროდ, მხოლოდ და მხოლოდ პოლიტიკური მიზნები ამოძრავებდათ ამ ადამიანებს“, – განაცხადა შალამბერიძემ.
მისივე შეფასებით, შექმნილმა რეალობამ დაადასტურა, რომ სექტორს საზოგადოების ინტერესები არ ამოძრავებდა.
„გვეგონა, რომ გამოჩნდებოდნენ ძალები და არასამთავრობო ორგანიზაციები, რომლებიც ჩვენი ბიუჯეტიდან მოახმარდნენ ჩვენს საზოგადოებას თანხებს, ამის სურვილი არავის გაუჩნდა. სამწუხარო რეალობა ეს არის. აქედან გამომდინარე იყო ეს გადაწყვეტილება მიღებული. იმ არასამთავრობო ორგანიზაციებს, რომლებიც გადაპორტირდნენ საქათმეებში, სადღაც ესტონეთში, არასოდეს ამოძრავებდათ ჩვენი საზოგადოების ინტერესები. მხოლოდ საკუთარი ვიწრო პოლიტიკური ინტერესებისთვის მუშაობდნენ“, – აღნიშნა შალამბერიძემ.