რუსეთის კრასნოდარის მხარეში მდებარე ილსკის ნავთობგადამამუშავებელი ქარხანა 26 სექტემბრის ღამით უკრაინული დრონებით სამიზნე გახდა. ინფორმაციას უკრაინული მედია ავრცელებს.
ინტერნეტში გავრცელებული კადრები და ადგილობრივი მოსახლეობის მიერ მიწოდებული ცნობები საწარმოში მასშტაბური ხანძრის გაჩენაზე მიუთითებს.
რუსული და უკრაინული წყაროები აცხადებდნენ, რომ დრონების თავდასხმის დროს ქარხნის მიმდებარე ტერიტორიაზე აფეთქებების ხმა ისმოდა.
კრასნოდარის მხარის გუბერნატორ ვენიამინ კონდრატიევის განცხადებით, დრონებით შეტევა სევერსკის რაიონზე განხორციელდა, სადაც ილსკის ნავთობგადამამუშავებელი ქარხანა მდებარეობს. გუბერნატორმა განაცხადა, რომ თავდასხმას მსხვერპლი მოჰყვა და ერთი ადამიანი მძიმედ დაშავდა.
კონდრატიევის ინფორმაციით, დრონის ნამსხვრევებმა საცხოვრებელი კორპუსიც დააზიანა, ხოლო რაიონში ორ საწარმოში ხანძარი გაჩნდა. მას არ დაუკონკრეტებია, თუ რომელი საწარმოები დაზიანდა.
ილსკის ნავთობგადამამუშავებელი ქარხანა უკრაინის მიერ კონტროლირებადი ტერიტორიიდან დაახლოებით 500 კილომეტრში მდებარეობს და სამხრეთ რუსეთის ერთ-ერთი უმსხვილესი ნავთობგადამამუშავებელი საწარმოა. ის წლიურად დაახლოებით 6,6 მილიონ ტონა საწვავს აწარმოებს.
ქარხანა რუსეთის წინააღმდეგ უკრაინის სრულმასშტაბიანი ომის დაწყების შემდეგ უკრაინული ძალების სამიზნე არაერთხელ გამხდარა. მედიის ინფორმაციით, ივნისისთვის საწარმოზე სულ მცირე 16 თავდასხმა იყო განხორციელებული.