არასამთავრობო ორგანიზაცია ,,ემიგრანტთა იმედის” ხელმძღვანელი შოთო სიხარულიძე ავღანეთში თავდასხმის შედეგად დაშავებული ერთ-ერთი ქართველი სამხედროს გიგა ხახუტაშვილის ჯანმრთელობის შესახებ წერს.
როგორც ირკვევა ხახუტაშვილის მშობელი ემიგრაციაში იმყოფება.
“მეგობრებო, ეს გიგა ხახუტაშვილია. ჩვენი ბარელი ემიგრანტის შვილი. ის ავღანეთში მსახურობს და იმ აფეთქებაში მოჰყვა, სადაც ჩვენი ვაჟკაცი დაიღუპა.
გიგა გერმანიაშია გადმოყვანილი. მდგომარეობა სტაბილურია, ფეხი შეუნარჩუნდა. ეს მისმა დედამ მომწერა. სიტყვა დაგახრჩობს ტკივილისგან…როგორი სათქმელია.. .უფალმა გაგაძლიეროს გიგა….მის საუკეთესო დედას მხნეობა და უფლის მადლი…ნახევარი საათის გამო რომ ვერ ჩახვალ უსაბუთობის გამო….რამდენს იტანს გული….ვფიქრობ და გული მეკუმშება…თუმცა ემიგრანტი ხომ ყველაფერს იტანს….ღმერთმა მისცეს მხნეობა’- წერს სიხარულიძე. თავდაცვის სამინისტროს ინფორმაციით, ავღანეთში, თავდასხმის შედეგად დაშავებული ორი სამხედრო მოსამსახურის, კაპიტან მიხეილ გვირჯიშვილისა და უფროსი ლეიტენანტ გიგა ხახუტაშვილის ჯანმრთელობის მდგომარეობა დამაკმაყოფილებელია.
მათივე ინფორმაციით, მათ ბაგრამის საავიაციო ბაზის ჰოსპიტალში ოპერაცია დაუყონებლივ ჩაუტარდათ. 23-ე ბატალიონის ექიმის, კაპიტან ირაკლი ქორთუშვილის განცხადებით, დაშავებული სამხედროები ამჟამად ექიმების მეთვალყურეობის ქვეშ იმყოფებიან და დაგეგმილია მათი გერმანიის ქალაქ ლანდშტულის რეგიონალურ სამედიცინო ცენტრში გადაყვანა.
კაპრალი გეგა ხარშილაძე კი, ბაგრამის სამედიცინო დაწესებულებიდან შესაბამისი სამედიცინო დახმარების აღმოჩენის შემდეგ გუშინვე გაეწერა და დაკისრებული ამოცანის შესრულებას შეუდგა.
შეგახსენებთ, რომ ავღანეთში მომხდარ თავდასხმას 25 წლის ქართველი სამხედრო შეეწირა.