ევროკავშირი შეზღუდავს უკრაინის წვდომას სასოფლო-სამეურნეო სუბსიდირებაზე, თუ ქვეყანა ბლოკს შეუერთდება, – ამის შესახებ ინფორმაციას „ფაინენშალ თაიმსი“ ავრცელებს.
გამოცემის ინფორმაციით, ევროკავშირის გაფართოების შესახებ ახალი წინადადებების თანახმად, თუ კიევი ბლოკის წევრი გახდება, ბრიუსელი „მნიშვნელოვნად შეზღუდავს“ უკრაინის წვდომას ევროკავშირის სასოფლო-სამეურნეო ბაზრებსა და სოფლის მეურნეობის სფეროში არსებულ მომგებიან სუბსიდირებაზე.
როგორც გამოცემა წერს, აღნიშნული შეზღუდვები მიზნად ისახავს ევროკავშირის წევრი ქვეყნების, მათ შორის პოლონეთის, საფრანგეთისა და იტალიის „დამშვიდებას“, რომლებიც შეშფოთებას გამოთქვამენ უკრაინული მარცვლეულისა და ზეთოვანი კულტურების დიდი მოცულობით შემოდინებით გამოწვეული კონკურენციის გამო.
დოკუმენტში უკრაინის სოფლის მეურნეობის სექტორის მასშტაბები, სტრუქტურა და მაღალი პროდუქტიულობაა დასახელებული იმ სპეციალური ზომების განხილვის საფუძვლად, რომლებიც მნიშვნელოვნად შეზღუდავს ფინანსურ მხარდაჭერასა და ბაზარზე წვდომას, მათ შორის ხორბლისა და სხვა მარცვლეული კულტურებისთვის.
ევროკავშირი სოფლის მეურნეობის სუბსიდირებისთვის ყოველწლიურად ჯამში 55 მილიარდ ევროს გამოყოფს. სამაგიეროდ, ბრიუსელი სთავაზობს უკრაინას დაეხმაროს ტრადიციულ საექსპორტო ბაზრებზე დაბრუნებაში, სადაც ვაჭრობა რუსეთის ომის გამო შეფერხდა. წინადადებები ჯერ კიდევ პროექტის სახითაა და არ არის მიღებული.
„ფაინენშალ თაიმსი“ იუწყება, რომ ევროკომისიის მაღალი თანამდებობის პირები მათ სამშაბათს განიხილავენ. რეფორმა ასევე მისცემს ახალ წევრ ქვეყნებს წვდომას ევროკავშირის ფონდებზე რეფორმების განხორციელების პირობით და გაამარტივებს იმ ქვეყნებისთვის ხმის მიცემის უფლების ჩამორთმევის პროცედურას, რომლებიც ბლოკის წესებს დაარღვევენ. უკრაინის, მოლდოვას, მონტენეგროსა და ალბანეთისთვის შემოთავაზებულია გაწევრიანების ინდივიდუალური „საგზაო რუკები“, რომლებშიც გაწევრიანების კონკრეტული თარიღები მითითებული არ არის.