რომის პაპი ლეო XIV საავადმყოფოში გადაიყვანეს. 13 ოქტომბერს, შუადღისას, იგი რომში, მონტე მარიოს ბორცვზე მდებარე ჯემელის კლინიკაში მოათავსეს. პაპს ფილტვიდან კვანძი უნდა ამოკვეთონ.
მომავალი ოპერაციის შესახებ პაპმა საზოგადოებას თავად აცნობა. კვირას, ტრადიციული ლოცვის , „ანგელუსის“ დროს, რომელსაც ის წმინდა პეტრეს მოედანზე შეკრებილი ათასობით მორწმუნის წინაშე აღავლენს ხოლმე, ლეო XIV-მ განაცხადა, რომ ოპერაცია უნდა გაიკეთოს. ამ ნაბიჯის გადადგმა მას ექიმებმა ურჩიეს. ფილტვში აღმოჩენილი კვანძი მკაფიოდ არის შემოსაზღვრული და მისი აღმოჩენა დაავადების განვითარების ძალიან ადრეულ ეტაპზე მოხერხდა. ამ მოულოდნელი განცხადებით, ლეო XIV-მ, როგორც ჩანს, მის ჯანმრთელობის მდგომარეობასთან დაკავშირებულ შესაძლო სპეკულაციებს წინსწრებით გასცა პასუხი. ვატიკანის სახელმწიფო მდივანმა, კარდინალმა პიეტრო პაროლინმა აღნიშნა, რომ მსგავსს არაფერს ელოდა და ეს ამბავი მისთვის „მეხის გავარდნასავით“ იყო.
ლეო XIV თავის ფიზიკურ ფორმას განსაკუთრებულ ყურადღებას აქცევს
71 წლის პაპის ჯანმრთელობის მდგომარეობის შესახებ დამატებითი ინფორმაცია არ გავრცელებულა. თუმცა, ეჭვგარეშეა, რომ ლეო XIV წინამორბედებზე უფრო ჯანმრთელი და ფიზიკურად ძლიერია. ცნობილია, რომ იგი ბევრს ვარჯიშობდა და სპორტის სხვადასხვა სახეობით, მათ შორის ჩოგბურთით იყო გატაცებული. გავრცელებული ინფორმაციით, პაპად არჩევამდე იგი კვირაში რამდენჯერმე ვატიკანის მახლობლად მდებარე ფიტნესცენტრში ვარჯიშობდა. ამბობენ, რომ სავარჯიშო დარბაზი მან სამოციქულო სასახლეშიც მოაწყო.
პაპი საავადმყოფოში, სავარაუდოდ, ერთ კვირას გაატარებს
ვატიკანი ცდილობს, საზოგადოებას სიმშვიდისა და დღის წესრიგის უპრობლემოდ გაგრძელების განცდა შეუქმნას და ამით თავიდან აიცილოს შთაბეჭდილება, თითქოს პაპის ჯანმრთელობის მდგომარეობის შესახებ ინფორმაციას მალავს. ვატიკანის ცნობით, ლეო XIV ამ კვირის დასაწყისში დაგეგმილ ყველა შეხვედრაში მონაწილეობდა.
მხოლოდ ოთხშაბათის მესაზე გაუშვა მან საკუთარი წარმომადგენელი. ამასთან, ქორწინებისა და ოჯახის საკითხებზე გამართული ეპისკოპოსთა შეხვედრის დასრულების შემდეგ, პაპს უნდა ექადაგა, თუმცა მის ნაცვლად ამას კარდინალი ლუის ანტონიო ტაგლე გააკეთებს. ეს უკანასკნელი კარდინალთა კოლეგიის დეკანად მხოლოდ გასულ კვირას დაინიშნა. სამშაბათის ჩათვლით დაგეგმილი დანარჩენი აუდიენციები გაუქმებულია. ვატიკანის ოფიციალური ინფორმაციით, პაპი საავადმყოფოში, სავარაუდოდ, დაახლოებით ერთ კვირას დარჩება.
რომის კურიის საქმიანობა თითქმის ჩვეულ რეჟიმში გრძელდება
პაპის აუდიენციების გარდა, ვატიკანში საქმიანობა ჩვეულ რეჟიმში გრძელდება. პაპს მხარს უჭერს კურია – ერთგვარი სამთავრობო აპარატი, რომელიც 16 დიკასტერიისგან შედგება. დიკასტერები, არსებითად, მინისტრის ფუნქციას ასრულებენ და კათოლიკურ ეკლესიას ხელმძღვანელობენ და მართავენ. წმინდა საყდრის დიპლომატიურ და პოლიტიკურ საქმიანობას სახელმწიფო სამდივნო ხელმძღვანელობს. მის სათავეში სახელმწიფო მდივანი, კარდინალი პიეტრო პაროლინი დგას. თუმცა, გარკვეული გადაწყვეტილებების მიღება და აქტების გამოცემა უშუალოდ პაპის უფლებამოსილებაა და ამ საკითხებში მისი შემცვლელი გათვალისწინებული არ არის.
იოანე პავლე II-მ ჯემელის კლინიკას „მესამე ვატიკანი“ უწოდა
ჯემელის კლინიკის მეათე სართულზე პაპისა და მისი უახლოესი თანამშრომლებისთვის ცალკე ფლიგელია გამოყოფილი. რომის პაპი იოანე პავლე II, რომელსაც ამ კლინიკაში სულ ათჯერ უმკურნალეს, მას ხუმრობით „მესამე ვატიკანს“ უწოდებდა. მათ რიცხვში იგი რომის გარეთ, კასტელ განდოლფოს ოფიციალურ რეზიდენციასაც გულისხმობდა.
თუმცა, იტალიური გაზეთების ცნობით, ამჟამად ეს ფლიგელი რემონტს საჭიროებს. ამიტომ, პაპისთვის ოთახები მეზობელ განყოფილებაში მოამზადეს.
პაპი ნოემბერში სამხრეთ ამერიკაში მიემგზავრება
ამ ეტაპზე, პაპი დაგეგმილი მოგზაურობის განრიგის შეცვლას არ აპირებს. 27 ოქტომბერს იგი ასიზიში მსოფლიო ლოცვისადმი მიძღვნულ შეხვედრას დაესწრება, 6 ნოემბერს კი სამხრეთ ამერიკაში ხანგრძლივ მოგზაურობას დაიწყებს. ტურნეს ფარგლებში იგი პერუსაც ეწვევა, სადაც წარსულში მისიონერად და ჩიკლაიოს ეპარქიის ეპისკოპოსად მსახურობდა.
https://www.br.de/nachrichten/deutschland-welt/knoten-in-der-lunge-papst-wird-im-krankenhaus-behandelt,VXvD7Zd