თეთრი სახლის რამდენიმე წარმომადგენელი ეჭვობს, რამდენ ხანს შეძლებს ქეთი ზაქარია პრეზიდენტის პრესმდივნის თანამდებობაზე დარჩენას. ინფორმაციას CNN-ი ავრცელებს.
დონალდ ტრამპის ახალი პრესმდივნის პირველი ბრიფინგი სამშაბათს გაიმართა და, თეთრი სახლის წარმომადგენლების შეფასებით, მისი გამოსვლა, სავარაუდოდ, პრეზიდენტის მოლოდინებს ვერ დააკმაყოფილებდა.
CNN-ის ცნობით, ტრამპის რამდენიმე მრჩეველმა და ადმინისტრაციის წარმომადგენელმა ბრიფინგი უარყოფითად შეაფასა. ერთ-ერთმა მას „კატასტროფული“ უწოდა. სხვებმა გამოსვლა უჩვეულოდ, უხერხულად, დაძაბულად და ზოგჯერ არასასიამოვნოდ აღწერეს.
ზაქარია პრესის წინაშე დაახლოებით 15 წუთის განმავლობაში საუბრობდა. დროის უმეტესი ნაწილი ტრამპის მიღწევების შესახებ შესავალ განცხადებას დაეთმო. მან ჟურნალისტების მხოლოდ სამ კითხვას უპასუხა, რის შემდეგაც ბრიფინგი დაასრულა.
თეთრი სახლის ზოგიერთ წარმომადგენელსა და ტრამპის მრჩეველს გაუგებრად მიაჩნია, რატომ იჩქარა ადმინისტრაციამ ზაქარიას პრესის წინაშე წარდგენა. საქმის კურსში მყოფი წყაროს ინფორმაციით, ბრიფინგის გამართვა თავად ტრამპმა მოითხოვა. წყაროს თქმით, პრეზიდენტის გარემოცვაში ზოგიერთს ამ გადაწყვეტილებასთან დაკავშირებით ეჭვები ჰქონდა, თუმცა მისთვის ცნობილი არ არის, გააცნეს თუ არა ეს მოსაზრებები ზაქარიას ან თავად ტრამპს.
„პრესის წინაშე წარდგენამდე ორი კვირის განმავლობაში ის რთული კითხვებისთვის უნდა მომზადებულიყო და სავარჯიშო ბრიფინგები გაევლო“, – განუცხადა ტრამპის ერთ-ერთმა მრჩეველმა CNN-ს და ზაქარიას გამოსვლა გააკრიტიკა.
„რატომ გამოიყვანეს ასე სწრაფად პრესის წინაშე? მეორე დღესვე, მოუმზადებელი, მისი წარდგენის არანაირი მიზეზი არ არსებობდა“, – განაცხადა თეთრი სახლის ერთ-ერთმა წარმომადგენელმა.
ბრიფინგის შემდეგ ტრამპმა ზაქარია შეაქო. „ვფიქრობ, ძალიან კარგი იყო“, – უთხრა მან ჟურნალისტებს. თეთრი სახლის კომუნიკაციების დირექტორმა სტივენ ჩუნგმაც დადებითად შეაფასა ახალი პრესმდივანი. CNN-ის კითხვის საპასუხოდ მან აღნიშნა, რომ „ქეთი გუნდის შესანიშნავი და მშვენიერი შენაძენია“.
საქმის კურსში მყოფი წყაროს ინფორმაციით, ზაქარია წინასწარ გეგმავდა ვრცელ შესავალ განცხადებას და მხოლოდ სამ კითხვაზე პასუხის გაცემას. ეს ტრამპის მოთხოვნა იყო. კითხვები წინასწარ შერჩეული მედიასაშუალებების ჟურნალისტებს უნდა დაესვათ.
ბრიფინგი ძალიან მოკლე აღმოჩნდა იმასთან შედარებით, რაც ბოლო პერიოდში თეთრ სახლში დამკვიდრებულ პრაქტიკად იქცა. ტრამპის ყოფილი პრესმდივნის კეროლაინ ლევიტის ბრიფინგები საშუალოდ დაახლოებით 45 წუთს გრძელდებოდა. პირველი ბრიფინგის დროს მან კითხვების დასმის შესაძლებლობა ჯერ ე.წ. ახალი მედიის ორ წარმომადგენელს მისცა, შემდეგ კი – Associated Press-ის კორესპონდენტს. ლევიტი ასევე პასუხობდა დარბაზის გასასვლელებში მდგომი ჟურნალისტების შეკითხვებს.
CNN-ის წყაროების ცნობით, ზაქარიას თეთრ სახლში დანიშვნამდე ტრამპი Fox News-ზე მისი გამოსვლებით საკმაოდ მოხიბლული იყო. თუმცა ერთ-ერთმა მრჩეველმა აღნიშნა, რომ საკაბელო ტელევიზიის გადაცემაში დისკუსიაში მონაწილეობა და მსოფლიოს წინაშე თეთრი სახლის პრესმდივნის რანგში გამოსვლა ერთმანეთისგან მნიშვნელოვნად განსხვავდება.
„ეჭვგარეშეა, ყველას გვენატრება კეროლაინი“, – განაცხადა ტრამპის ერთ-ერთმა მრჩეველმა.