„პარი სენ-ჟერმენისა“ და საფრანგეთის ნაკრების ყოფილმა ფეხბურთელმა, ჟერომ როტენმა RMC Sport-ზე, თავის გადაცემაში ხვიჩა კვარაცხელიას ტრავმაზე ისაუბრა და განაცხადა, რომ პარიზული გუნდისთვის ქართველი შემტევის გამოკლება კატასტროფა იქნება.
დიახ, ეს კატასტროფაა. დღეს კლუბს სხვაგვარად არ შეუძლია კომუნიკაცია, გარდა იმისა, რომ თქვას: გუნდი ძლიერია, ზაფხულის სატრანსფერო ფანჯრისას ახალი ფეხბურთელები მოვიდნენ და ახლა მათ მეტი სათამაშო დრო ექნებათ მნიშვნელოვან, დიდ მატჩებში. კვარა აღარ არის, ამიტომ ასეც იქნება. მე უბრალოდ ვამბობ, რომ ეს კატასტროფაა. რატომ? იმიტომ, რომ ვხედავდი, როგორ გავიდოდა პსჟ ჩემპიონთა ლიგის ბოლომდე.
მინდა, ვიხილო მესამე ვარსკვლავი და ვიცხოვრო ამ წლით. და ვფიქრობ, რომ კვარას გარეშე ეს ძალიან რთული იქნება. კვარა რომ არ ყოფილიყო ბოლო ორი წლის განმავლობაში, როცა პსჟ-მ ჩემპიონთა ლიგა მოიგო, ისინი ამას ვერასდროს შეძლებდნენ. ვერც კი წარმოიდგენთ და ეს ძალიან ხშირად გვითქვამს, მართალია, სეზონის დასაწყისი კვარასთვის ბრწყინვალე არ ყოფილა, მაგრამ ეს ეჭვქვეშ არ აყენებს მის საფეხბურთო ხარისხს და, რაც მთავარია, მის მნიშვნელობას ლუის ენრიკეს ტაქტიკურ სქემაში. სწორედ ამიტომ მიმაჩნია ეს კატასტროფად.
ინდივიდუალურად, რა თქმა უნდა, შეუცვლელი არავინაა. ფეხბურთს გუნდური სპორტი ჰქვია. ამიტომ, მსოფლიოს საუკეთესო ფეხბურთელიც რომ არ იყოს მოედანზე, მისმა გუნდმა შეიძლება მაინც მოიგოს და ეს უკვე გვინახავს. როცა მბაპე „რეალში“ არ თამაშობდა, მათ მაინც მოახერხეს მატჩების მოგება.
როცა ლეო მესი ზოგჯერ არ იყო, გუნდი მაინც იგებდა. ხომ ხედავ, ასეთი რაღაცები ხდება. იამალი რომ არ იყოს „ბარსელონაში“, მათ მაინც შეუძლიათ მოგება, მაგრამ გუნდი აშკარად უფრო სუსტია. და როცა ლუის ენრიკეს გეგმაზე გესაუბრები, ვგულისხმობ იმას, რომ ეს არის ბიჭი, რომელსაც ეჭვი არასდროს ეპარება საკუთარ თავში. მას არასდროს სტკივა. როცა ძლიერ დარტყმას იღებს, ყოველ ჯერზე, მისი პირველი რეაქცია ექიმებთან ასეთია: „ქართველია, მყარი, ქართველი, მყარი“. სწორედ ამიტომაა ის დღეს ძალიან მოწყენილი, რადგან ახლა, ამ „მყარ“ ბიჭს მოუწევს იწვეს… ან იქნებ არ იწვეს, მაგრამ 7 თვე მოედანს მიღმა დარჩეს. იმედი გვაქვს, ცოტა ნაკლები დრო დასჭირდება.
პრობლემა იმაშია, თუ რას წარმოადგენს ის, როცა პსჟ-ს უჭირს. და ეს შარშანაც დავინახეთ. რა თქმა უნდა, პსჟ-ს ზოგჯერ უჭირდა. შარშან მათ კიდევ უფრო კარგად ისწავლეს ტანჯვა-წვალებით თამაში და სწორედ ასე მოიპოვეს ჩემპიონთა ლიგის თასი. მაგრამ როგორ გაუმკლავდნენ ისინი ამ სირთულეებს? გაგახსენებთ „ბაიერნთან“ ნახევარფინალს. იქ კვარამ აჩვენა, რომ თავის თავში ეჭვი არ ეპარება. ის იქ არის, ყველას წინ მიუძღვის, გოლი გააქვს და თანაგუნდელებს ამხნევებს. ეს ის ძალაა, როცა შენ წინ ასეთ თავდამსხმელს ხედავ – როცა ნახევარმცველი ან მცველი ხარ და ხედავ ბიჭს, რომელიც თავს არ ზოგავს, უკან ჩამოდის, ისევ უტევს, ორთაბრძოლებს იგებს, ჯანიანია, ნამდვილი კლდეა – ეს შენც მეტ ძალას გაძლევს. და ეს ბიჭი, სამწუხაროდ, აღარ გეყოლება. ეს კი დიდი პრობლემაა,“ – განაცხადა როტენმა.
ცნობისთვის, ხვიჩა კვარაცხელიამ ჩემპიონთა ლიგის მესამე ტურში, ბარსელონას წინააღმდეგ უმძიმესი ტრავმა მიიღო. ქართველმა შემტევმა მარჯვენა მუხლის ჯვარედინი იოგები გაიწყვიტა. უახლოეს დღეებში ხვიჩას ოპერაცია ჩაუტარდება, სარეაბილიტაციო პროცესს კი 7-9 თვე დასჭირდება.