თბილისის საქალაქო სასამართლო საკრებულოს წევრის, ზურაბ ნეფარიძისა და მისი ცოლის დისთვის, ქრთამის აღების ბრალდების გამო, აღკვეთის ღონისძიებად პატიმრობის შეფარდებასთან დაკავშირებით, განცხადებას ავრცელებს.
“თბილისის საქალაქო სასამართლომ დააკმაყოფილა ბრალდების მხარის შუამდგომლობა სამოხელეო დანაშაულის ფაქტზე, ბრალდებულების ზ.ნ.–ს და ა. მ.–ს მიმართ და მათ აღკვეთის ღონისძიების სახედ შეუფარდა პატიმრობა.
ზ.ნ.–ს ბრალად ედება ქრთამის აღება, ესე იგი მოხელის მიერ ფულის პირდაპირი მოთხოვნა და მიღება, თავის სასარგებლოდ, რათა ამ მოხელემ ქრთამის მიმცემის სასარგებლოდ თანამდებობრივი უფლება–მოვალეობების შესრულებისას თავი შეიკავოს რაიმე ქმედების განხორციელებისაგან, ჩადენილი ძალადობით. მანვე ჩაიდინა შრომის კანონმდებლობის დარღვევა, ესე იგი პირის იძულება დაწეროს განცხადება საკუთარი ინიციატივით სამუშაოდან გათავისუფლების თაობაზე.
ა. მ.–ს ბრალად ედება ქრთამის აღებაში დახმარება, ესე იგი მოხელის მიერ თავის სასარგებლოდ ფულის პირდაპირ მოთხოვნასა და მიღებაში დახმარება, რათა მოხელემ ქრთამის მიმცემის სასარგებლოდ თანამდებობრივი უფლება–მოვალეობების შესრულებისას თავი შეიკავოს რაიმე ქმედების განხორციელებისაგან, ჩადენილი ძალადობით.
სასამართლომ განიხილა შუამდგომლობა, მოისმინა მხარეთა განმარტებები, გაეცნო წარმოდგენილ მასალებს, შეამოწმა შუამდგომლობის საფუძვლიანობა და მიიჩნია, რომ იგი უნდა დაკმაყოფილდეს, ვინაიდან სახეზეა განსაკუთრებით მძიმე კატეგორიის სამოხელეო დანაშაულის შესაძლო ჩადენის ფაქტი. სასამართლომ მხედველობაში მიიღო ის გარემოება, რომ საქმეზე ჩასატარებელია რიგი საგამოძიებო მოქმედებები, ამასთან დასაბუთებული ვარაუდის სტანდარტით, არსებობს ბრალდებულთა მიერ დანაშაულებრივი საქმიანობის გაგრძელების, ახალი დანაშაულის ჩადენის და გამოძიებისათვის ხელის შეშლის საფრთხეები“, – ნათქვამია თბილისის საქალაქო სასამართლოს განცხადებაში.
საკრებულოს დეპუტატს, ზურაბ ნეფარიძეს ბრალი ქრთამის აღებისთვის გუშინ ოფიციალურად წარუდგინეს. მისი ადვოკატის, სულხან კაპანაძის განცხადებით, ბრალდება 11-დან 15 წლამდე თავისუფლების აღკვეთას ითვალისწინებს. დეპუტატი დაკავებას პოლიტიკურ საქმიანობას უკავშირებს.
ანტიკორუფციულმა სააგენტომ თბილისის საკრებულოს წევრი, ზურაბ ნეფარიძე 26 აგვისტოს დააკავა. ის 2014 წლიდან თბილისის საკრებულოს წევრი და ისნის მაჟორიტარი დეპუტატია “ეროვნული ფორუმიდან”. წარსულში ნეფარიძე შინაგან საქმეთა სამინისტროში სხვადასხვა თანამდებობებზე მუშაობდა.